गाय चोरल्याच्या आरोपाखाली दलित युवकांची धिंड

बलिया: गायी चोरल्याच्या आरोपाखाली दोन दलित युवकांचे मुंडण करून त्यांना गावभर फिरवल्याची घटना उघड झाली आहे. उत्तर प्रदेशातील बलिया जिल्ह्यात ही घटना घडली आहे. हिंदू युवा वाहिनीच्या कार्यकर्त्यांनी हे कृत्य केल्याचा आरोप दलित युवकांच्या पालकांनी केला आहे.

याबाबत पोलिसांनी दिलेल्या माहितीनुसार, गाय चोरल्याच्या आरोपाखाली प्रवीण श्रीवास्तव याच्या तक्रारीवरून दोन आरोपी युवकांना कलम ३७९ आणि ४११ खाली अटक करण्यात आली आहे.

हिंदू युवा वाहिनीच्या कार्यकर्त्यांनी आपल्या मुलाचे मुंडण केल्याचा आरोप उमा राम यांनी केला आहे. मुंडण केल्यानंतर त्या कार्यकर्त्यांनी आपल्या मुलाच्या गळ्यात टायर लटकावले आणि त्याला संपूर्ण रसडा गावात फिरवले. इतकेच नाही, तर त्यावेळी त्यांनी आपल्या मुलाच्या गळ्यात 'आम्ही गायचोर आहोत' असे लिहिलेला फलकही लटकावला होता, अशी माहिती उमा राम यांनी दिली आहे.

उमा राम यांच्या तक्रारीवरून पोलिसांनी एका व्यक्तीसह १५ अज्ञातांविरुद्ध गुन्हा नोंदवला आहे. या सर्वांविरोधात अॅट्रोसिटी कायद्यानुसार गुन्हा नोंदवण्यात आला आहे. या संपूर्ण प्रकरणाचा तपास पोलिस उपअधीक्षक अवधेश चौधरी यांच्यावर सोपवण्यात आल्याचे बलियाचे पोलिस अधीक्षक अनिल कुमार यांनी सांगितले आहे. या प्रकरणाचा तपास करून चौधरी अहवाल सादर करणार आहेत.