...तर कपडे काढून नाचा; पर्रिकरांचा तोल सुटला

मटा ऑनलाइन वृत्त । पणजी

अत्यंत शांत स्वभाव आणि नम्र बोलण्यासाठी प्रसिद्ध असलेले गोव्याचे माजी मुख्यमंत्री आणि सध्याचे संरक्षणमंत्री मनोहर पर्रिकर यांनी रागाच्या भरात आक्षेपार्ह विधान करून सगळ्यांनाच धक्का दिला आहे. गोव्यातील काही टीकाकार पत्रकारांचा समाचार घेताना पर्रिकरांचा तोल सुटला. प्रसिद्धीसाठी वाट्टेल ते बडबडणाऱ्या, बिनबुडाचे आरोप करणाऱ्या लोकांनी कपडे काढून नाचावं, अशा अशोभनीय शब्दांत त्यांनी आपला संताप व्यक्त केला.

गोव्यात विधानसभा निवडणुकीचे वारे वाहू लागले आहेत. राजकीय नेत्यांमध्ये आरोप-प्रत्यारोपांच्या फैरी झडू लागल्यातच, पण वृत्तपत्रांमधूनही सरकारच्या कामकाजाचा आढावा घेतला जातोय. त्यात पर्रिकर यांच्या काही टीकाकार पत्रकारांनी त्यांच्याविरोधात लेखणी परजली आहे. हा 'स्ट्राइक' बहुतेक संरक्षणमंत्र्यांना सहन झाला नाही आणि भाजपच्या सात्तारी इथल्या सभेत या रागाचा स्फोट झाला.

१९६८ मध्ये अमेरिकेतील वॉटरगेट घोटाळ्याबाबत एका संपादकाने थेट रिचर्ड निक्सन यांना उद्देशून अग्रलेख लिहिला होता. आता मराठीत लिहिलेलं हे पत्र त्यांच्यापर्यंत कसं पोहोचणार होतं. पण, काही लोकांना त्यांच्या मर्यादा कळत नाहीत. प्रसिद्धीसाठी ते वायफळ बडबड करत असतात. अशा लोकांना माझा सल्ला आहे की, त्यांनी कपडे काढून नागडं नाचावं, असं मनोहर पर्रिकर तिरमिरीत म्हणाले. मी त्या वृत्तपत्राचं नाव घेणार नाही. त्या वृत्तपत्राचे संपादक आंतरराष्ट्रीय पातळीवरील संपादक होते. त्यांना वृद्धापकाळात इकडे आणलं होतं आणि त्यांच्या वृत्तपत्राचा खप एक हजार होता, असं सांगत त्यांनी आपण कुणाबद्दल बोलतोय याचे संकेत दिले. त्यामुळे येत्या काळात टीकाकार आणि पर्रिकर यांच्यातील वाद अधिक तीव्र होण्याची शक्यता आहे.