मुलं बिघडू नयेत म्हणून 'इथं' स्मार्टफोनवर बंदी

मटा ऑनलाइन वृत्त । सहारणपूर

देशातील एक महत्त्वाची इस्लामी शिक्षण संस्था अशी ओळख असलेल्या दारुल उलूम देवबंदनं विद्यार्थ्यांना स्मार्टफोन वापरास बंदी केली आहे. तसं पत्रकच काढण्यात आलं असून बंदीआदेश मोडल्यास संस्थेतून नाव काढून टाकण्याचा इशारा देण्यात आला आहे.

देवबंदचे कुलगुरू मौलाना अबुल कासिम नोमानी यांनी या बंदीचं समर्थन केलं आहे. 'मुलांना शिक्षण देण्याबरोबरच त्यांना संस्कारी बनवणं ही आमची जबाबदारी आहे. त्या दृष्टीकोनातूनच आम्ही हे पाऊल उचललं आहे. सिनेमा, क्रिकेट व इंटरनेटवर अनावश्यक साइट पाहणाऱ्या मुलांना आम्ही शिक्षण देऊ शकत नाही. कॅमेरा व विविध फिचरवाले फोन वापरणं हा देवबंदमध्ये गुन्हा असेल,' असं त्यांनी सांगितलं. 'मुलं साधा फोन स्वत:जवळ बाळगू शकतात. मात्र, त्याचा वापर फावल्या वेळेतच करता येईल,' असंही त्यांनी स्पष्ट केलं. विद्यार्थ्यांनीही देवबंदच्या या निर्णयाचं स्वागत केलं आहे.

दारुल उलूम देवबंद ही संस्था उत्तर प्रदेशात आहे. या संस्थेत देश-विदेशातून हजारो मुलं इस्लामचं शिक्षण घेण्यासाठी येतात.