महिलांनी वरातीला जाणं इस्लामविरोधी: दारुल

सहारनपूर:

महाराष्ट्र टाइम्स.कॉम

काही दिवसांपूर्वीच लग्न समारंभात स्त्री-पुरुषांनी एकत्र जेवणं हे इस्लामविरोधी आहे, असा फतवा काढून चर्चेत राहिलेल्या 'दारुल उलूम देवबंद'नं नवा फतवा काढला आहे. लग्नाच्या वरातीत महिलांनी सहभागी होणे इस्लामविरोधी असल्याचं या संस्थेनं म्हटलं आहे.

लग्नासाठी नवरदेव वरात घेऊन निघाल्यानंतर त्यात नाचगाणं होतं. कुटुंबीय आणि नातेवाईकांसह ओळखीतल्या महिलाही त्यात सहभागी होतात. अशा वरातीला शरीयत मान्यता देतं का, असा प्रश्न फुलासी येथील रहिवासी नजम गौड यानं दारुल उलूम देवबंदला विचारला होता. त्यावर संस्थेनं नवीन फतवा काढला आहे. वरातीत महिलांनी सहभागी होणे इस्लामविरोधी आहे. वरातीत महिला आणि पुरुषांनी एकत्रित सहभागी होणे टाळावे. नववधूच्या पाठवणीवेळी घरातील दोन किंवा तीन सदस्यांनीच जावे, असं या फतव्यात म्हटलं आहे.