दाऊदला गँगरीन नाही; छोटा शकीलचा दावा

मटा ऑनलाइन वृत्त । नवी दिल्ली

अंडरवर्ल्ड डॉन दाऊद इब्राहिमला गँगरीन झाल्याच्या वृत्ताचं गुप्तचर अधिकारी आणि त्याचा प्रमुख साथीदार छोटा शकीलनं खंडन केलं आहे. 'भाई' एकदम फीट आहे, असं छोटा शकीलनं 'टाइम्स ऑफ इंडिया'ला सांगितलं.

मुंबई बॉम्बस्फोटातील मुख्य आरोपी आणि भारताचा मोस्ट वॉन्टेड दाऊद गॅंगरीननं त्रस्त आहे आणि तो मरणाच्या दारात आहे, असा दावा काल, सोमवारी एका वृत्तवाहिनीनं केला होता. त्याचा जीव वाचवण्यासाठी दोन्ही पाय कापावे लागणार आहेत, असंही म्हटलं होतं.

छोटा शकीलनं दाऊदला गँगरीन झाल्याचं वृत्त फेटाळलं. तुमच्या वृत्तसंस्थेकडं असलेली माहिती साफ चुकीची आहे. ही केवळ अफवा आहे. 'भाई' एकदम तंदुरुस्त आहे. डी कंपनीचा कारभार उद्ध्वस्त करण्यासाठीच दाऊद आजारी असल्याची अफवा पसरवण्यात आल्याचंही त्यानं सांगितलं.

कराचीमधील क्लिंफ्टन परिसरातील दाऊदच्या घरी काही डॉक्टरांना पाहिलं होतं. त्यामुळंच दाऊद आजारी असून गँगरीनमुळं त्याचे दोन्ही पाय कापावे लागणार, अशी माहिती समोर आली. तसंच दाऊदच्या घरी आलेले डॉक्टर लियाकत नॅशनल हॉस्पिटल आणि मिल्ट्री हॉस्पिटलमधील होते, असं सूत्रांचं म्हणणं आहे.