जिच्या हत्येसाठी वडील-भाऊ तुरुंगात, ती ९ वर्षांनी परतली, डीएनए चाचणी अन् हादरवणारं गूढ उकललं

छिंदवाडा: मध्य प्रदेशातील छिंदवाडा जिल्ह्यातील अमरवाडा येथे काही महिन्यांपूर्वी एका घटनेने खळबळ उडाली होती. जेव्हा एक मृत महिला गावात परतली आणि तिने जिवंत असल्याचा दावा केला. जेव्हाकी पोलिसांना तिचा सांगाडा सापडला होता. तिच्या हत्येचा आरोप तिच्याच वडी आणि भावावर लावण्यात आला होता. याप्रकरणी तिचे वडील सध्या जामिनावर बाहेर आहेत. तर तिचा भाऊ तुरुंगात आहे. पण, आता या प्रकरणी नवा ट्विस्ट आला आहे.

जेव्हा या महिलेने ती जिवंत असल्याचा दावा केला. तेव्हा पोलिसांनी त्यांची डीएनए चाचणी केली. डीएनए चाचणी अहवालात ही महिला सत्य बोलत असल्याचं स्पष्ट झालं आहे. ही तीच कांचन आहे जिच्या हत्येचा आरोप तिच्या भाऊ आणि वडिलांवर लावण्यात आला होता. दोघांनाही पोलिसांनी अटक करून तुरुंगात पाठवले होते. वडील जामिनावर बाहेर आहेत तर भाऊ तुरुंगात आहे.

दारात मांडव, घरात आनंद; तेवढ्यात अनर्थ घडला, लग्नाच्या तीन दिवसांपूर्वी नवरदेवाचा मृत्यू
डीएनए तपासाचा अहवाल आल्यानंतर या गुंतागुंतीच्या प्रकरणाशी संबंधित माहिती पोलिसांनी न्यायालयाला दिली. याप्रकरणी पुढे काय कारवाई करायची हे न्यायालय ठरवेल. एसडीओपी रवींद्र मिश्रा यांनी सांगितले की, कांचनसह शन्नू उईके आणि त्यांची पत्नी लक्ष्मीबाई यांच्या रक्ताचे नमुने तपासणीसाठी पाठवण्यात आले होते. डीएनए चाचणीचा अहवाल बुधवारी आला. कांचन ही शन्नूची मुलगी असल्याचे अहवालात स्पष्ट झाले आहे.

९ वर्षांपूर्वी १४ वर्षांची कांचन घरातून अचानक गायब झाली होती. पोलीस तपासात २०२१ मध्ये कांचनचा खून झाल्याचे उघड झाले. १३ जून २०१४ च्या रात्री भाऊ सोनू याने कांचनवर काठीने हल्ला करून तिची हत्या केली, असा आरोप होता. या प्रकरणी सोनू आणि त्याचे वडील शन्नू यांना सिंगोडी पोलिसांनी आरोपी ठरवले होते. आरोपीच्या सांगण्यावरून पोलिसांनी एक सांगाडाही जप्त केला आहे. २९ मार्च २०२३ रोजी कांचन अचानक गावात परतली. तिने तीच कांचन असल्याचा दावा केला होता. या संपूर्ण प्रकरणाचा पोलीस पुन्हा तपास करत आहेत.


आता या प्रकरणी सर्वात मोठा प्रश्न हा आहे की २०२१ मध्ये पोलिसांना जो सांगाडा आढळून आला होता तो कोणाचा होता. या संपूर्ण प्रकरणामध्ये सर्वांसमोर मोठा प्रश्न हा आहे की 2021 मध्ये पोलिसांनी कबर खोदून कोणाचा सांगाडा जप्त केला होता. कांचन समोर आल्यानंतर तिच्या वडिलांनी सांगितलं की ज्या ठिकाणाहून सांगाडा जप्त करण्यात आला ते ठिकाण त्यांचे वडिलोपार्जित स्मशानभूमी आहे. पोलिसांनी जप्त केलेला सांगाडा त्यांच्या मावशीचा आहे. जो त्यांनी कांचनचा असल्याचं सांगितलं होतं.