बालकांचं लैंगिक शोषण केल्यास फाशी

नवी दिल्ली: १२ वर्षापर्यंतच्या मुलींचं लैंगिक शोषण करणाऱ्यांना फाशी देण्याच्या अध्यादेशाला राष्ट्रपती रामनाथ कोविंद यांनी मंजुरी दिल्यानंतर आता लैंगिक शोषणाचे बळी ठरलेल्या बालकांना न्याय देण्यासाठी केंद्र सरकारने कंबर कसली आहे. बालकांचे लैंगिक शोषण करणाऱ्यास फाशीची शिक्षा देण्याच्या हालचाली केंद्र सरकारने सुरू केल्या आहेत. त्यासाठी पोक्सो कायद्यात सुधारणा करण्यात येणार असल्याचं सूत्रांनी सांगितलं.

केंद्रीय महिला आणि बाल विकास मंत्रालयाने त्यांच्या ट्विटर हँडलवरून ही माहिती दिली आहे. 'लैंगिक शोषणाबाबत नेहमीच निष्पक्ष कायदा बनविण्याचं काम सरकार करत असते. त्यामुळेच लैंगिक शोषणाचा बळी ठरलेल्या मुलांना न्याय देण्यासाठी केंद्राने पोक्सो कायद्यात दुरुस्ती करण्याचा करण्याचा प्रस्ताव तयार केला आहे,' असं महिला व बालकल्याण मंत्रालयाने म्हटलं आहे. 'चेंज डॉट ओआरजी' बाबत चित्रपट निर्माते इंसिया दरीवाला यांनी एक याचिका न्यायालयात दाखल केली होती. बालकांच्या लैंगिक शोषणाकडे भारतात दुर्लक्ष होत असल्याचं त्यांनी म्हटलं होतं. त्यांच्या या याचिकेचं महिला व बाल विकास मंत्री मनेका गांधी यांनी समर्थन केलं होतं.

'बाल लैंगिक शोषणाबाबत कोणताच भेदभाव केला जात नाही. लहान वयात लैंगिक शोषणाचे बळी पडलेली मुलं आयुष्यभर एककल्ली राहतात. ही गंभीर समस्या असून त्यातून मार्ग काढायला हवा,' असं मनेका गांधी यांनी सांगितलं.