नौदलासाठी १११ हेलिकॉप्टर खरेदी करणार; ४६ हजार कोटी मंजूर

नवी दिल्ली

संरक्षण मंत्रालयानं आज नौदलासाठी ४६ हजार कोटी रुपयांच्या मोठ्या खरेदी प्रस्तावाला मंजुरी दिली आहे. याद्वारे नौदलासाठी १११ बहुउद्देशीय हेलिकॉप्टर, तसेच सुमारे १५० तोफखाना बंदूक प्रणाली खरेदी केली जाणार आहे. याबाबत मिळालेल्या माहितीनुसार, हेलिकॉप्टर खरेदी करारावर जवळजवळ २१ हजार कोटी रुपये खर्च होणार आहेत.

लष्करासाठी सामग्री खरेदी करण्याचा हा निर्णय संरक्षण अधिग्रहण परिषदेतच्या (डीएसी) एका बैठकीत घेण्यात आला. डीएसी ही लष्कराशी संबंधित खरेदीबाबत निर्णय घेणारी सर्वात मोठी संस्था आहे.

या खरेदीबाबत अधिक माहिती देताना एका वरिष्ठ अधिकाऱ्याने सांगितले की, डीएएसने ११ हेलिकॉप्टर खरेदीला मंजुरी दिली आहे. यात २१ हजार कोटी रुपये खर्च करण्यात येतील. धोरणात्मक भागीदारीअंतर्गत संरक्षण मंत्रालयाचा हा पहिलाच प्रकल्प आहे. या प्रकल्पाचा उद्देश 'मेक इन इंडिया' कार्यक्रमाला चालना देणे हा आहे.

डीएसीने आणखीही काही खरेदी प्रस्तावांना मंजुरी दिली आहे. यात सुमारे २४,८७९ कोटी रुपये खर्च होणार आहेत. यात लष्करासाठी १५५मिमीच्या १५० तोफखाना बंदूका खरेदी करण्यात येतील अशी माहिती या अधिकाऱ्याने दिली. या बंदूका आपल्याच देशात तयार करण्यात येतील. यावर सुमारे ३,३६४ कोटी रुपये खर्च होणार आहेत. याबरोबरच आखूड टप्प्यातील क्षेपणास्त्र प्रणाली खरेदी करण्यालाही मंजुरी देण्यात आली आहे. यातील १० प्रणाली स्वदेशी असणार आहेत.

ही खरेदी गेल्या अनेक दिवसांपासून प्रलंबित होती. गेल्या वर्षी ऑगस्टमध्ये नौदलाने १११ बहुउद्देशीय आणि १२३ बहुपयोगी हेलिकॉप्टर्स खरेदी करण्यासाठी रिक्वेस्ट फॉर इन्फॉर्मेशन (आरएफआय) दिले होते. यापूर्वी देखील याच खरेदीसाठी २०११ आणि २०१३ मध्ये आरएफआय जारी करण्यात आला होता.