केजरीवालांच्या चोरीला गेलेल्या कारमध्ये तलवार

मटा ऑनलाइन वृत्त | नवी दिल्ली

दिल्लीचे मुख्यमंत्री अरविंद केजरीवाल यांची चोरीला गेलेली कार उत्तर प्रदेशातील गाझियाबाद येथे सापडली. दिल्लीच्या सचिवालयाबाहेरून ती चोरीला गेली होती. या कारमध्ये एक तलवार आणि शूटींग कार्ड सापडले आहे. पोलिसांनी कार जप्त केली आहे. ही कार तिथे कुणी नेली, हे अद्याप कळू शकलेले नाही.

केजरीवाल यांची निळ्या रंगाची वॅगन-आर कार दोन दिवसांपूर्वी दिल्लीच्या सचिवालयाबाहेरून चोरीला गेली होती. ती गाझियाबादमधील मोहननगर परिसरात बेवारस स्थितीत आढळली. या कारमध्ये तलवार आणि शूटींग कार्ड (नेमबाजीच्या खेळात वापरण्यात येणारे) सापडले आहे.

दरम्यान, कार चोरीला गेल्यानंतर केजरीवाल यांनी नायब राज्यपालांना पत्र लिहून दिल्लीच्या कायदा आणि सुव्यवस्थेवर प्रश्नचिन्ह उपस्थित केले होते. २०१५ मधील विधानसभा निवडणुकीपर्यंत केजरीवाल ही कार वापरत होते. ती सॉफ्टवेअर इंजिनीअर कुंदन शर्मा यांनी जानेवारी २०१३ मध्ये केजरीवालांना भेट दिली होती.