पी. चिदंबरम, लालूंना दिलासा

नवी दिल्ली

माजी केंद्रीय मंत्री पी. चिदंबरम व त्यांचे पुत्र कार्ती यांना दिल्ली न्यायालयाने अटकेपासून १८ फेब्रुवारीपर्यंत संरक्षण दिले आहे. एअरसेल मॅक्सिस गैरव्यवहारप्रकरणात हे दोघे पिता-पुत्र आरोपी आहेत. १ फेब्रुवारीला या प्रकरणाची सुनावणी होणार होती. मात्र आपण उपलब्ध नसल्याचे सांगून सीबीआय न्यायालयाचे विशेष न्यायमूर्ती ओ. पी. सैनी यांनी अटकेपासून संरक्षण १८ फेब्रुवारीपर्यंत वाढवले.

दरम्यान, आयआरसीटीसीच्या हॉटेलांच्या व्यवस्थापन कंत्राटात मनी लाँडरिंग केल्याच्या खटल्यात माजी रेल्वेमंत्री लालूप्रसाद यादव, त्यांच्या पत्नी राबडीदेवी आणि पुत्र तेजस्वी यादव यांना येथील एका न्यायालयाने जामीन मंजूर केला. तिघांचीही एक लाख रुपयांचा वैयक्तिक मुचलका आणि तेवढ्याच रकमेचे हमीपत्र घेऊन न्यायालयाने तिघांना जामीन मंजूर केला.