साप-खोपडीचे टॅटू गोंदवण्यासाठी 'तो' खून करायचा

मटा ऑनलाइन वृत्त | नवी दिल्ली

साप आणि खोपडीचे टॅटू आपल्या शरीरावर गोंदवण्याची हौस भागवण्यासाठी लूटमार आणि खून करणाऱ्या आरोपीच्या दिल्ली पोलिसांच्या गुन्हे शाखेने मुसक्या आवळल्या आहेत. त्याच्याकडून लुटमारीच्या पैशांतून तो महागड्या दुकानांमध्ये टॅटू गोंदवून घेत असे, अशी माहिती समोर आली आहे.

दिल्ली पोलिसांनी गुरुवारी रात्री विकीला अटक केली. त्याच्याकडून शस्त्रे आणि स्फोटके हस्तगत केली आहेत. त्याच्यावर हत्या आणि लुटमारीचे ५० हून अधिक गंभीर गुन्हे दाखल आहेत. दिल्ली आणि हरयाणातील १९ गुन्ह्यांचा समावेश आहे. त्यात हत्या, हत्येचा प्रयत्न, वाहनचोरी आणि दरोड्याच्या गुन्ह्यांचा समावेश आहे. त्याच्यावर २५ हजारांचे 'इनाम' ठेवण्यात आले होते. पोलिसांनी दिलेल्या माहितीनुसार, विकीला पकडण्यासाठी एक पथक स्थापन करण्यात आले होते. गुरुवारी रात्री तो रोहिणीमध्ये येणार असल्याची टीप मिळाली. त्याला पकडण्यासाठी पोलिसांनी सापळा रचला. त्याने देशी पिस्तुलातून पोलिसांवर गोळी झाडण्याचाही प्रयत्न केला. पण पोलिसांनी त्याला पकडलं. त्याच्याकडून पिस्तूल आणि काडतूस जप्त करण्यात आल्या. त्याला टॅटू गोंदवण्याची हौस होती. दक्षिण आणि मध्य दिल्लीतील महागड्या दुकानांमध्ये टॅटू गोंदवून घेण्यासाठी पैसे लागायचे. त्यासाठी खून आणि लूटमार करायचा, अशी कबुली त्याने पोलिसांकडे दिली.