चोरी प्रकरणी अर्णब यांना कोर्टाची नोटीस

मटा ऑनलाइन वृत्त । नवी दिल्ली

एम्प्लॉयमेंट कॉन्ट्रॅक्टचं उल्लंघन आणि 'टाइम्स नाउ' न्यूज चॅनलच्या बौद्धिक संपदेचा दुरुपयोग केल्याप्रकरणी दिल्ली हायकोर्टाने अर्णब गोस्वामी यांच्याविरोधात नोटीस बजावली आहे. गोस्वामी हे बेनेट, कोलमन अॅण्ड कंपनी लिमिटेडचा (बीसीसीएल) मालकी हक्क असलेली वृत्तवाहिनी 'टाइम्स नाउ'चे माजी संपादक आहेत.

भारतातील सर्वात मोठे मीडिया हाऊस असलेल्या 'बीसीसीएल'कडून टाइम्स ऑफ इंडिया, द इकॉनॉमिक्स टाइम्स, नवभारत टाइम्स, महाराष्ट्र टाइम्स याशिवाय अनेक प्रसिद्ध मॅगझीन्स प्रकाशित केली जातात.

'बीसीसीएल'ने काही दिवसांपूर्वीच गोस्वामी यांच्याविरोधात गुन्हेगारी स्वरूपाचा खटला दाखल केला आहे. कंपनीकडून दाखल करण्यात आलेल्या तक्रारीनुसार, रिपल्बिक टीव्ही वृत्तवाहिनीवर सुनंदा पुष्कर प्रकरण आणि लालू प्रसाद यादव यांच्याशी संबंधित बातमीत चालवण्यात आलेल्या ऑडियो टेप गोस्वामी आणि प्रेमा श्रीदेवी यांनी 'टाइम्स नाउ'चे कर्मचारी असताना मिळवल्या होत्या. प्रेमा ही 'टाइम्स नाउ'मध्ये पत्रकार म्हणून काम करत होती. अर्णबने गेल्यावर्षी 'टाइम्स नाउ' सोडल्यानंतर आता या महिन्यात रिपब्लिक टीव्ही लाँच केला आहे.

६ मे रोजी या वृत्तवाहिनीचे प्रसारण सुरू झाले आणि त्याच दिवशी राष्ट्रीय जनता दलाचे प्रमुख लालू प्रसाद यादव यांच्याबाबत एक वृत्त दाखवून हा गौप्यस्फोट असल्याचा दावा करण्यात आला. त्यात बिहारचे माजी मुख्यमंत्री लालू प्रसाद यादव आणि जेलमध्ये असलेला शहाबुद्दीन यांच्यातील फोनवरील संभाषण प्रसारित करण्यात आलं. त्यानंतर ८ मे रोजी रिपब्लिकन टीव्हीने दुसरा 'गौप्यस्फोट' केला. त्यात प्रेमा श्रीदेवी, सुनंदा पुष्कर आणि सुनंदा यांचा नोकर नारायण यांच्यातील संभाषणाची टेप चालवण्यात आली.

'बीसीसीएल'ने याबाबत अंतर्गत तपास केला असता, हे दोन्ही गौप्यस्फोट करण्यासाठी ज्या सामग्रीचा वापर करण्यात आला ती सामग्री गोस्वामी आणि श्रीदेवी यांनी 'टाइम्स नाउ'चे कर्मचारी असताना मिळवली होती, असे स्पष्ट संकेत मिळत आहेत. त्यातच दिवंगत सुनंदा पुष्कर आणि त्यांच्या नोकराच्या संभाषणाचा ऑडियो आमच्याकडे दोन वर्षांपासून असल्याचे गोस्वामी आणि श्रीदेवी यांनी कबूल केलेले आहे.

'टाइम्स नाउ'चे सीईओ एम. के. आनंद यांनी सांगितले की, रिपब्लिक टीव्हीवर जेव्हा संबंधित ऑडियो टेप चालवण्यात आल्या तेव्हाच 'टाइम्स नाउ'ची सामग्री चोरीला गेल्याचे व्यवस्थापनाच्या लक्षात आले. एवढी उंची गाठलेल्या एखाद्या व्यक्तीने चोर बनावं आणि आपली वृत्तवाहिनी सुरू करण्यासाठी 'टाइम्स नाउ'चा कंटेंट चोरावा, ही बाब खरंच खेदजनक आहे. ज्याप्रकारे या दोन्ही स्टोरीज वृत्तवाहिनी सुरू झाल्यानंतर पहिल्या तीनच दिवसांत दाखवण्यात आल्या ते पाहता हे सगळंच सुनियोजित योजनेनुसार करण्यात आल्याचं स्पष्टपणे दिसत आहे.

अर्णब आणि प्रेमा या दोघांनी 'टाइम्स नाउ'च्या बौद्धिक संपदेचा हेतुपुरस्सर वापर केला आहे, असा आरोप 'बीसीसीएल'ने केला असून भारतीय दंड विधान कलम ४०३ तसेच दुसऱ्याच्या मालकीच्या संपदेचा दुरुपयोग केल्याच्या गुन्ह्याप्रकरणी भारतीय दंड विधानाची अन्य कलमे आणि माहिती तंत्रज्ञान कायद्यानुसार खटला चालवण्याची मागणी 'बीसीसीएल'ने केली आहे.

माहिती तंत्रज्ञान कायद्यातील कलम ६६ ब नुसार, जर कुणी वाईट हेतुने कॉम्प्युटर किंवा अन्य कम्युनिकेशन डिवाइसमधून माहिती मिळवली वा चोरली तर तीन वर्षांपर्यंत कारावास आणि एक लाख रुपये दंड किंवा दोन्ही शिक्षा एकत्रित देण्याची तरतूद आहे.