१९८४ शीख दंगलः ८८ दोषींची शिक्षा कायम

नवी दिल्ली

दिल्लीच्या त्रिलोकपुरी परिसरात १९८४ साली झालेल्या शीखविरोधी दंगलीत हिंसाचार करणाऱ्या ८८ दोषींची शिक्षा दिल्ली हायकोर्टाने कायम ठेवली आहे. जिल्हा सत्र न्यायालयाने ८८ दोषींना ५-५ वर्षाची शिक्षा ठोठावली होती.

जिल्हा सत्र न्यायालयाने २७ ऑगस्ट १९९६ साली ८८ आरोपींना दोषी ठरवत ५-५ वर्षाची शिक्षा ठोठावली होती. आरोपींनी या शिक्षेला आव्हान देत दिल्ली हायकोर्टात धाव घेतली होती. ८८ जणांवर दंगल करणे, घर जाळणे, कर्फ्यूचे उल्लंघन करणे, यासारखे आरोप आहेत. सत्र न्यायालयाचा निकाल कायम ठेवत दिल्ली हायकोर्टाने शिक्षा कायम ठेवली आहे. तब्बल २२ वर्षांनंतर दिल्ली हायकोर्टाने आरोपींच्या शिक्षेवर शिक्कामोर्तब केले आहे.

१४ नोव्हेंबर रोजी शीखविरोधी दंगलीतील एका प्रकरणात कोर्टाने यशपाल सिंहला दोषीला मृत्यूदंडाची शिक्षा आणि नरेश सेहरावत या अन्य एका आरोपीला जन्मठेपेची शिक्षा सुनावण्यात आली होती.