'कट्टर हिंदू एकता' व्हॉटसअप ग्रुप
एका विशेष समुदायातील लोकांची हत्या करण्यासाठी, 'बदला' घेण्यासाठी आणि दंगल पसरवण्यासाठी एक व्हॉटसअप ग्रुप तयार करण्यात आला होता. या ग्रुपचं 'कट्टर हिंदू एकता' (Kattar Hindu Ekta) असं नामकरण करण्यात आलं होतं. या ग्रुपमध्ये तब्बल १२५ जणांना सामील करून घेण्यात आलं होतं. २५-२६ फेब्रुवारीच्या हिंसेच्या एक दिवस अगोदर म्हणजेच २४ फेब्रुवारी रोजी हा ग्रुप तयार करण्यात आला होता
'जय श्रीराम'चे नारे देण्यास भाग पाडलं
चार्जशीटमध्ये केलेल्या उल्लेखानुसार, २५-२६ फेब्रुवारीला दंगलीदरम्यान जोहरीपूर नाल्याजवळून जाणाऱ्या लोकांना या व्हॉटसअप ग्रुपमध्ये सहभागी असलेले उपद्रवी लोक त्यांची नावं विचारत होती. इतकंच नाही तर या माहितीची खातरजमा करण्यासाठी ते लोकांची ओळखपत्रंही तपासत होते. अडवण्यात आलेल्या लोकांना 'जय श्रीराम'चे नारे देण्यास हा ग्रुप भाग पाडत होता. ज्या मुस्लीम व्यक्तींनी 'जय श्रीराम'चे नारे देण्यास नकार दिले त्यांची हत्या करून मृतदेह नाल्यात फेकून देण्यात आले
व्हॉटसअप ग्रुप बनवणाऱ्या आरोपीचा शोध सुरू
९ हत्या करण्यात आल्यानंतर ग्रुपमधील अनेक सदस्य या ग्रुपमधून एक्झिट झाले होते. ८ मार्चपर्यंत ४७ जण या ग्रुपमधून बाहेर पडले होते. तसंच त्यांनी हा ग्रुपही डीलिट करून टाकला. चार्जशीटनुसार, हा ग्रुप बनवणाऱ्या आरोपीचा शोध अद्याप सुरू आहे. क्राईम ब्रान्चनं व्हॉटसअप ग्रुप आणि हत्येशी निगडीत एका आरोपीला अगोदर अटक केली. त्याचा फोन ताब्यात घेतल्यानंतर त्यातून धक्कादायक माहिती समोर आली आणि या दंगलीचा कट रचण्यासाठी तयार करण्यात आलेल्या या व्हॉटसअप ग्रुपचा भांडाफोड झाला.
आरोपी लोकेश गुप्तानं व्हॉटसअपवर दिली हत्येची कबुली
व्हॉटसअप ग्रुपचा सदस्य लोकेश गुप्ता यानं ग्रुपवर दिलेली हत्येची कबुलीचा पोलिसांनी पुरावा म्हणून चार्जशीटमध्ये उल्लेख केलाय. २६ फेब्रुवारी रोजी रात्री ११.३९ वाजता लोकेशनं लिहिलं होतं 'भावांनो, मी गंगाविहारमधून लोकेश सोलंकी. जर कुणाला काही समस्या असतील, लोक कमी पडले तर सांगा. मी आपली संपूर्ण गंगाविहारची टीम सोबत घेऊन येऊल. आपल्याकडे सगळं सामान आहे, बंदूक सगळं काही'....
व्हॉटसअप ग्रुपमध्ये भडकाऊ वक्तव्य
त्यानंतर रात्री ११.४४ वाजता त्यानं पुन्हा म्हटलं, 'तुमच्या भावानं आत्ताच आपल्या टीमसोबत भागीरथी विहारमध्ये दोन XXX मारलेत आणि नाल्यात फेकलेत. विनय तुला माहीत आहे ना की तुजा भाऊ अशा कामांमध्ये नेहमी पुढे असतो'. त्यानंतर रात्री १२.१५ वाजता लोकेशनं लिहिलं 'भावांनो, संपूर्ण रात्रभर जागा आहे. काहीही असेल तर एकदा फक्त आठवण काढा' ... आरोपी लोकेश गुप्ताचं हे व्हॉटसअप चॅट पोलिसांनी 'कृत्याची कबुली' मानलीय.
कडकड्डूमा कोर्टात तीन चार्जशीट दाखल
उल्लेखनीय म्हणजे, दिल्ली दंगल प्रकरणात दिल्ली पोलिसांच्या क्राईम ब्रान्चनं कडकड्डूमा कोर्टात तीन चार्जशीट दाखल केल्या आहेत. ३ मार्च २०२० रोजी गोकुलपुरी पोलीस स्टेशनमध्ये दाखल करण्यात आलेल्या तीन एफआयआर (FIR) नुसार या चार्जशीट दाखल करण्यात आल्या आहेत. या तीन एफआयआरमध्ये एकूण ९ जणांना आरोपी बनवण्यात आलंय. हे सर्व आरोपी सध्या न्यायालयीन कोठडीत आहेत. हत्या तसंच हत्येचा कट रचण्यासहीत इतर गंभीर गुन्हे या आरोपींवर दाखल करण्यात आलेत. या प्रकरणातील आणखीन अनेक आरोपींचा तपास सुरू आहे.