दिल्ली हिंसाचार: दंगलीत घडले माणुसकीचे दर्शन

नवी दिल्ली: गेल्या चार दिवसांपासून ईशान्य दिल्लीत सुरू झालेला हिंसाचार आज चौथ्या दिवशीही शमताना दिसत नाही. या हिंसाचारात आतापर्यंत १८ जणांचा बळी गेला आहे. एकमेकाच्या जीवावर उठलेल्या जमावाच्या हिंसक कारवाया सुरू असताना अशाही वातावरणात दिलासादायक घटनाही घडत आहेत. माणुसकीचे दर्शन घडवत अनेक मानवतावादी नागरिकांनी जात-धर्म न पाहता माणसांना वाचवण्यासाठी पुढाकार घेतला. संकटात सापडलेल्या नागरिकांना वाचवण्याच्या प्रयत्नांचे पडसाद सोशल मीडियावर उमटल्यावाचून राहिले नाहीत.

ईशान्य दिल्लीत दंगलखोरांनी सुरू केलेल्या हिंसाचारात फसलेल्या अनेकांचे प्राण वाचवण्याचे प्रयत्न मानवतावादी लोकांनी केल्याचे दिसते. हे मदतीचे काम करत असताना दोन्ही धर्मांतील मानवतावादी व्यक्तींनी आपण हिंदू माणसाला वाचवतो आहोत की मुस्लिम व्यक्तीला याचा कोणताही विचार केला नाही, अशीही उदाहरणे पुढे येत आहेत.

रमेश पार्क परिसरात घाबरलेल्या स्थानिक मुस्लिम नागरिकांना हिंदू आणि शीख नारिकांनी मदत केल्याची घटनाही स्पष्ट झाली आहे.


ईशान्य दिल्लीतील हनुमान मंदिर भागात स्थानिक मुस्लिम नागरिकांना हिंदू कुटुंबाला वाचवल्याची माहिती फैजन नावाच्या तरुणाने सोशल मीडियावर शेअर केली आहे.


भारतीय जनता पक्षाच्या स्थानिक नगरसेवकानेही धर्म न पाहता मुस्लिम कुटुंबाचे प्राण वाचवले.

ईशान्य दिल्लीतील शीख समाजाला मुस्लिम समाजातील नागरिकांना गुरुद्वारा खुले करत आश्रय देत मानवतेचे दर्शन घडवले.