राष्ट्रपती भवनही जमीनदोस्त करा: आझम खान

मटा ऑनलाइन वृत्त । नवी दिल्ली

आग्रा येथील ताज महलवरून उठलेला राजकीय वाद थांबण्याची चिन्हं दिसत नाहीत. आमदार संगीत सोम, खासदार असदुद्दीन ओवेसी यांच्यानंतर आता उत्तर प्रदेशचे माजी मंत्री आझम खान यांनी या वादात उडी घेतली आहे. 'ताज महलप्रमाणेच दिल्लीतील राष्ट्रपती भवनाची वास्तू देखील गुलामीचं प्रतीक आहे. त्यामुळं ही वास्तूही जमीनदोस्त करा,' असा सल्ला आझम खान यांनी सरकारला दिला आहे.

'ताज महल हा भारताचा सांस्कृतिक वारसा नाही. ही वास्तू बांधणाऱ्यांना हिंदूंचा सर्वनाश करायचा होता,' असं वक्तव्य भाजपचे यूपीतील आमदार संगीत सोम यांनी केलं होतं. त्यांना एमआयएमचे खासदार असदुद्दीन ओवेसी यांनी काल उत्तर दिलं होतं. दिल्लीतील लाल किल्लाही गद्दारांनी बांधला आहे. तिथं ध्वजारोहण करणं पंतप्रधान थांबवणार का,' असा सवाल ओवेसी यांनी केला होता. आझम खान यांनी त्यापुढं जात भारतात परकियांनी बांधलेल्या वास्तूंची यादीच दिली असून या सर्व वास्तू नष्ट करण्याची सूचना केली आहे.

'कधी काळी आपल्यावर सत्ता गाजवणाऱ्यांनी भारतात उभारलेल्या सर्व वास्तू ही गुलामीची प्रतीकं आहेत. संसद भवन, कुतुब मिनार, राष्ट्रपती भवन, लाल किल्ला, ताज महल हे सगळेच त्यात आले. गुलामीची आठवण करून देणाऱ्या या सगळ्या वास्तू उद्ध्वस्त केल्या पाहिजेत. यापूर्वी मी हे मत मांडलंय,' असं आझम म्हणाले.