नोटाबंदीमुळे सप, बसपला घरघरः अमित शहा

वृत्तसंस्था। वाराणसी

‘केंद्र सरकारने घेतलेल्या नोटाबंदीच्या निर्णयामुळे समाजवादी पक्ष आणि बहुजन समाज पक्षाला घरघर लागली आहे. समजावादीच्या नेत्यांची पुरात अडकलेल्या जनावरांसारखी अवस्था झाली आहे. उत्तर प्रदेशच्या माजी मुख्यमंत्री आणि बसप अध्यक्षा मायावती या निस्तेज झाल्या आहेत,’ अशा शब्दांत भारतीय जनता पक्षाचे राष्ट्रीय अध्यक्ष अमित शहा यांनी सडकून टीका केली आहे.

माजी संरक्षणमंत्री आणि समाजवादी पक्षाचे अध्यक्ष मुलायमसिंह यादव यांच्या आझमगड या लोकसभा मतदारसंघात आयोजित प्रचार सभेत ते बोलत होते. ते म्हणाले, ‘पुरामध्ये ज्याप्रमाणे जनावरे झाडांवर चढून बसतात त्यांच्याप्रमाणे सपचे नेते वागत आहेत. सप, बसपमधील काही नेते काही दिवसांपूर्वी पत्र्याच्या खोल्यांत राहत होते त्यांनी आता महालांचे मालक झाले आहेत. मोदींनी त्यांचा काळा पैसा रद्दी बनवून टाकला आहे.’

‘दहशतवाद, नक्षलवाद, ड्रग माफिया आणि भ्रष्टाचारी लोकांचे कंबरडे मोडणाऱ्या या निर्णयामुळे ममता बॅनर्जी, अरविंद केजरीवाल आणि सप, बसपच्या नेत्यांना पोटशूळ का उठलाय हे समजत नाही,’ असेही शहा म्हणाले.