नोटाबंदी: सव्वा दोन लाख कंपन्यांना टाळं

मटा ऑनलाइन वृत्त । नवी दिल्ली

नोटाबंदी जाहीर झाल्यानंतर काळा पैसा पांढरा करणाऱ्या कंपन्यांचा केंद्र सरकारनं जबरदस्त दणका दिला आहे. केंद्र सरकारने नोटाबंदीनंतर आर्थिक गैरव्यवहार करणाऱ्या देशातील एकूण २ लाख २४ हजार कंपन्यांना टाळं ठोकलं आहे. धक्कादायक म्हणजे या सर्व कंपन्यांचं कामकाज गेल्या २ वर्षांपासून बंद होतं.

कंपनी व्यवहार मंत्रालयाने (कार्पोरेट अफेअर्स मंत्रालय) एक प्रसिद्धीपत्रक काढून ही माहिती दिली आहे. नोटाबंदीनंतर कंपनी व्यवहार मंत्रालयाने ३५ हजार कंपन्यांची झाडाझडती घेतली. प्राथमिक चौकशीत या कंपन्यांची एकूण ५८ हजार खाती असल्याचं आढळून आलं. या खात्यांमधून नोटाबंदीनंतर एकूण १७ हजार कोटी रूपयांचे व्यवहार करण्यात आले. या व्यवहाराबाबत ५६ बँकांनी सरकारला माहिती दिली. त्यानंतर या २ लाख २४ हजार कंपन्यांना टाळं ठोकण्यात आलं आहे.

नोटाबंदीनंतर दोन हजार कोटी जमा

कंपन्यांची झाडाझडती घेताना तपास यंत्रणेच्या हाती आश्चर्यकारक माहिती लागली आहे. एका प्रकरणात तर नोटाबंदीपूर्वी एका कंपनीच्या खात्यात एक पैसाही जमा नव्हता. मात्र नोटबंदी लागू होताच या कंपनीच्या खात्यात २ हजार ४८४ कोटी जमा झाल्याचं आढळून आलं. तर एका कंपनीचे २ हजार १३४ खाती असल्याचे आढळून आलं असून या कंपनीची चौकशी सुरू आहे.

विशेष टास्क फोर्स स्थापन

नोटाबंदीनंतर आर्थिक गैरव्यवहार करणाऱ्या या कंपन्यांवर कारवाई करण्यासाठी पंतप्रधान कार्यालयाने महसूल सचिव आणि कंपनी व्यवहार मंत्रालयाच्या सचिवाच्या नेतृत्वाखाली एका विशेष टास्क फोर्सची स्थापना केली आहे. या टास्क फोर्सने अनेक कंपन्यांची झाडाझडती घेऊन त्यांच्यावर कारवाईही सुरू केली आहे. त्यामुळे काळा पैशाची साठेबाजी करणाऱ्यांना आळा बसणार असल्याचं प्रसिद्धीपत्रकात म्हटलं आहे.