व्हॉट्सअॅप शिकलात तसे कॅशलेस व्हा: मोदी

मटा ऑनलाइन वृत्त । नवी दिल्ली

सर्वांना आपला स्वकमाईचा पैसा खर्च करण्याचा अधिकार आहे मात्र आज जग बदललं आहे. रोख स्वरूपातील व्यवहार मागे पडत चालले आहेत. 'कॅशलेस' अर्थव्यवस्था ही काळाची गरज झाली आहे, असे नमूद करत पंतप्रधान नरेंद्र मोदी यांनी 'कॅशलेस' होण्याचा संदेश आज दिला. नोटाबंदीच्या निर्णयाआधी पूर्वतयारी केली नाही अशी टीका करणाऱ्या विरोधकांनाही त्यांनी यावेळी फटकारले.

संविधान दिनानिमित्त संसद भवनात आयोजित करण्यात आलेल्या सोहळ्यात पंतप्रधान बोलत होते. पंतप्रधान म्हणाले, 'सरकारने पूर्वतयारी केली नाही ही खरं तर अडचण नसून काळा पैसा असणाऱ्यांना 'मौका' दिला नाही, याचाच त्रास अनेकांना होत आहे, जर त्यांना ७२ तास दिले असते तर ते खुश झाले असते.'

व्हॉट्सअॅपचा दिला दाखला

रोख स्वरूपात पैसे हातात असायलाच हवेत अशी काही गरज नाही. आता रोखीशिवायही बहुतांश व्यवहार सुरळीतपणे होऊ शकतील, असे अनेक पर्याय उपलब्ध झाले आहेत, असे नमूद करत मोदींना कॅशलेस व्यवहारांसाठी आग्रह धरला. व्हॉट्सअॅप आपल्याला कोणी शिकवले नाही मात्र आज प्रत्येक जण सहजरित्या व्हॉट्सअॅप वापरत आहे. याच पद्धतीने आपल्याला कॅशलेस अर्थव्यवस्थेच्या दिशेने वाटचाल करावी लागेल, असे पंतप्रधानांनी पुढे स्पष्ट केले. काळ्या पैशाविरोधाताली लढाईत 'आम आदमी' खऱ्या अर्थाने सैनिक बनला आहे, असेही पंतप्रधान यावेळी म्हणाले.