नोटाबंदी लागू करण्यात घोडचुका झाल्या

मटा ऑनलाइन वृत्त । नवी दिल्ली

'नोटाबंदी लागू करण्याची पंतप्रधान नरेंद्र मोदी यांची संकल्पना चांगली होती. पण त्याची अंमलबजावणी करताना घोडचूक करण्यात आली,' असं स्पष्ट मत अमेरिकेतील नोबेल पुरस्कार विजेते अर्थतज्ज्ञ रिचर्ड थेलर यांनी व्यक्त केलं. 'एकदा नोटाबंदी लागू केल्यानंतर दोन हजाराची नोट चलनात आणायची गरजच नव्हती. दोन हजाराची नोट बाजारात आणण्याचा घेण्यात आलेला निर्णय अनाकलनीय असून त्यामुळे काळा पैसा नष्ट करण्याच्या आणि कॅश लेस इकॉनॉमीला सुरूवात करण्याच्या उद्देशाला हरताळ फासला गेला आहे,' असं थेलर यांनी सांगितलं.

शिकागो विद्यापीठातील विद्यार्थी स्वराज कुमार याने थेलर यांच्याशी टि्वटर आणि ई-मेलद्वारे संवाद साधला. यावेळी स्वराज यांनी मोदी सरकारने केलेल्या नोटाबंदीबाबत थेलर यांना काही प्रश्न विचारले असता त्यांनी हे उत्तर दिलं. 'कॅशलेस सोसायटी निर्माण करण्यासाठी आणि भ्रष्टाचाराचा नायनाट करण्यासाठी ही संकल्पना खूप चांगली होती. परंतु ही संकल्पना लागू करताना अनेक चुका करण्यात आल्या. नोटाबंदी लागू केल्यानंतर तात्काळ दोन हजाराची नोट चलनात आणल्याने मुळ उद्देश्यावर पाणी फेरल्या गेलं,' असं थेलर यांनी ई-मेलमध्ये म्हटलं आहे. स्वराजने थेलर यांचं हे म्हणणं टि्वटरवर टि्वट केलं. त्याला थेलर यांनी रिटि्वट केलं आहे.

विशेष म्हणजे ८ नोव्हेंबर २०१६ रोजी मोदींनी नोटाबंदी जाहीर केल्यानंतर थेलर यांनी टि्वट करून मोदी सरकारच्या या निर्णयाचं स्वागत केलं होतं. मात्र त्यानंतर मोदी सरकारने घेतलेले निर्णय ऐकल्यावर त्यांनी नाराजीही व्यक्त केली होती. मोदी सरकारने दोन हजाराची नोट चलनात आणायला नको होती, असंही त्यांनी स्पष्ट केलं होतं.