रामरहीमची हायकोर्टात धाव

मटा ऑनलाइन वृत्त । नवी दिल्ली

बलात्काराच्या दोन प्रकरणामध्ये विशेष सीबीआय कोर्टाने सुनावलेल्या शिक्षेला डेरा सच्चा सौदा प्रमुख गुरमीत रामरहीम सिंगने पंजाब आणि हरयाणा हायकोर्टात आव्हान दिले आहे. रामरहीमच्या वतीने त्याच्या वकिलांनी हायकोर्टात आव्हान याचिका दाखल केली आहे.

'रामरहीम यांच्यावर ठेवण्यात आलेले आरोप खोटे आहेत. त्यांच्यात शारीरिक संबंध ठेवण्याची क्षमताच नाही. त्यामुळे या मुद्द्यासह अनेक मुद्द्यांवर कोर्टात आव्हान देण्यात आले आहे, असे रामरहीमचे वकील विशाल गर्ग नरवाणा यांनी सांगितले.

दरम्यान, ५० वर्षीय रामरहीमला दोन साध्वींवर बलात्कार केल्याप्रकरणी प्रत्येकी १० वर्षे अशी २० वर्षे सश्रम कारावासाची तसेच १५-१५ लाख रुपये दंडाची शिक्षा पंचकुला येथील विशेष सीबीआय कोर्टाने ठोठावली आहे. ही शिक्षा सुनावण्यात आल्यानंतर रामरहीम सध्या रोहतक येथील सुनारिया कारागृहात शिक्षा भोगत आहे.