भारतीय बनावटीची 'धनुष' तोफ चाचणीत नापास

मटा ऑनलाइन वृत्त | नवी दिल्ली

बोफोर्स तोफांच्या धर्तीवर तयार करण्यात आलेल्या संपूर्ण भारतीय बनावटीच्या 'धनुष' तोफेची चाचणी अयशस्वी ठरली आहे. चाचणीच्या वेळी तोफेच्या गोळ्याचं आवरण मजल ब्रेकला धडकल्यानं ही चाचणी फसल्याचं सांगितलं जातं. या अपयशामुळं 'धनुष' लष्कराच्या ताफ्यात समाविष्ट करण्याच्या योजनेला धक्का बसला आहे.

मजल ब्रेक हे उपकरण तोफेच्या अगदी टोकावर बसवलेलं असतं. तोफ डागताना निर्माण होणारा दाब नियंत्रणात आणण्याच काम मजल ब्रेक करतं. मे महिन्यात देखील या तोफेची चाचणी घेताना हीच अडचण निर्माण झाली होती, असंही सूत्रांनी सांगितलं. 'धनुष'ची निर्मिती जबलपूरस्थित शस्त्रास्त्र निर्मिती कारखान्यात केली गेली आहे. तोफेच्या डिझाइनबाबतही प्रश्न उपस्थित केले गेले होते. त्यानंतर काही बदल सुचवण्यात आले. यात तोफेच्या मजल ब्रेकला थोडं मोठं करण्याचा सल्ला देण्यात आला होता. बोफोर्स तोफांसाठी वापरण्यात आलेल्या तंत्रज्ञानात आणखी भर टाकून या तोफेची निर्मिती करण्यात आली आहे. 'धनुष'ची मारक क्षमता ३८ किमी इतकी निश्चित करण्यात आली होती. ज्याची चाचणी अंतिम टप्प्यात होती. ती झाल्यानंतर लष्कराच्या तोफखान्यात ही अत्याधुनिक तोफ समाविष्ट होणं अपेक्षित होतं.