'ब्ल्यू व्हेल' गेम रोखा, मनेका गांधींचे पत्र

मटा ऑनलाइन वृत्त । नवी दिल्ली

अनेकांच्या जीवावर बेतलेल्या 'ब्ल्यू व्हेल' गेमची माहिती तंत्रज्ञान मंत्रालयाने गंभीर दखल घेवूनही हा गेम सुरूच आहे. मंत्रालयाने सोशल मीडिया साइट्सला हा गेम हटवण्याचे दोन वेळा आदेश दिलेत. तरीही त्याला लगाम बसलेला नाही. यामुळे आता महिला बालकल्याणमंत्री मनेका गांधी यांनी केंद्रीय गृहमंत्रालय आणि माहिती तंत्रज्ञान मंत्र्यांना पत्र लिहिले आहे. 'ब्ल्यू व्हेल' गेम सोशल मीडिया साइट्सवरून त्वरीत हटवण्याची मागणी त्यांनी पत्रातून केली आहे.

'ब्ल्यू व्हेल' चॅलेंजमुळे मुलांच्या आत्महत्येचे प्रकार सुरूच आहे. बालहक्क अधिकाराचे संरक्षण करणाऱ्या 'नॅशनल कमिशन फॉर प्रोटेक्शन ऑफ चाइल्ड राइट्स'ने माहिती तंत्रज्ञान मंत्रालयाला पत्र लिहिले होते. यानंतर माहिती तंत्रज्ञान मंत्रालयाने सोशल मीडिया साइट्सला हा गेम हटवण्याचे आदेश दिले होते. यानंतर एका मुलाने या गेममुळे आत्महत्य केली. हा मुद्दा संसदेतही उपस्थित केला गेला. यानंतर पुन्हा माहिती तंत्रज्ञान मंत्रालयाने संबंधित सोशल मीडिया साइट्सला हा गेम पसरण्यापासून रोखण्याचे आदेश दिले होते.

'ब्ल्यू व्हेल' चॅलेंजने आतापर्यंत १०० मुलांचा जीव गेला आहे. यामुळे हा गेम पसरण्यापासून रोखला पाहिजे. हे चॅलेंज सोशल मीडिया साइट्सवरून हटवा', अशी मागणी मनेका गांधी यांनी केली आहे. तसंच 'आपली मुलं या चॅलेंजमध्ये फसणार नाहीत याची काळजी पालकांनी घ्यावी', असं आवाहनही मनेका गांधी यांनी केलंय. 'चीन जर अशा गेमला आळा घालू शकतो तर भारतालाही हे शक्य आहे', असं एका अधिकाऱ्याने सांगितलं.