एडिटर्स गिल्डचा इशारा
वृत्तसंस्था, नवी दिल्ली
राफेल व्यवहारातील कागदपत्रांबाबत प्रसारमाध्यमांनी दिलेल्या बातम्यांसंदर्भात अॅटर्नी जनरल यांनी सर्वोच्च न्यायालयापुढे केलेल्या वक्तव्याचा एडिटर्स गिल्ड ऑफ इंडियाने स्पष्ट शब्दांत निषेध केला आहे. पत्रकारांना गोपनीयता कायद्याचा धाक दाखवून त्यांच्या सूत्रांची माहिती उघड करण्यास भाग पाडण्याचा प्रयत्न निषेधार्ह आहे, असे एडिटर्स गिल्डने म्हटले आहे.
एडिटर्स गिल्ड ऑफ इंडियाने यासंदर्भात एक निवेदन जारी केले आहे. या प्रकरणी प्रसारमाध्यमांच्या स्वातंत्र्यावर गदा आणणारी कोणतीही कारवाई करू नये, असे स्पष्ट करत या धमक्यांचा निषेध करण्यात आला आहे.
राफेलसंदर्भात सर्वोच्च न्यायालयाच्या आधीच्या आदेशाच्या पुनर्विचारासाठी दाखल झालेली नवीन याचिका संरक्षण मंत्रालयातून चोरीला गेलेल्या कागदपत्रांवर आधारित आहे, असे कारण देत ही फेटाळण्याची मागणी अॅटर्नी जनरल के. के. वेणुगोपाल यांनी केली होती. कागदपत्रे चोरीस जाण्याचा प्रकार हा गोपनीयता कायद्याचा भंग आहे का, या संदर्भात तपास सुरू असल्याचे त्यांनी सांगितले होते.