OPD मध्ये खुर्ची नसल्याने डॉक्टरचा राजीनामा

नवी दिल्ली

हॉस्पिटलमधील ओपीडीमध्ये बसायला खूर्ची मिळत नाही म्हणून बाबू जगजीवन राम हॉस्पिटलमधील एका निवासी डॉक्टराने चक्क राजीनामा दिला आहे.

बाबू जगजीवन राम हॉस्पिटलचे निवासी डॉक्टर अंकित ओम यांनी मुख्यमंत्री आणि आरोग्यमंत्र्यांना पत्र पाठवून आपल्या पदाचा राजीनामा दिला आहे. या हॉस्पिटलमध्ये डॉक्टरांना पिण्यासाठी स्वच्छ पाणी नाही. जेवण करण्यासाठी कॅन्टिन नाही. ओपीडीत बसायला खूर्ची नाही, असं म्हणत यासर्व प्रकारामुळे मी व्यथीत झालो आहे. प्रशासनाने याकडे सपशेल दुर्लक्ष केल्याने मी माझ्या पदाचा राजीनामा देत आहे, असे अंकित ओम यांनी पत्रात म्हटले आहे. डॉक्टरांना चांगल्या सुविधा मिळाल्या तर ते रुग्णांची सेवा चांगल्या प्रकारे करू शकतील, असेही अंकित ओम म्हणाले.

अंकित ओम हे जानेवारीपासून निवासी डॉक्टर म्हणून या हॉस्पिटलमध्ये रुजू झाले होते. परंतु, या ठिकाणी ओपीडीमध्ये डॉक्टरला बसण्यासाठी साधी खुर्ची नाही. रुग्णांची तपासणी करण्यासाठी डॉक्टरांना उभे राहावे लागते. रुग्णांना प्रिस्क्रिप्शन लिहून देण्यासाठी या ठिकाणी कागद सुद्धा नव्हता. याविषयी तक्रार केल्यानंतर डॉक्टरांना कागद मिळाला. उपचार करताना जर रुग्णांना काही झाले तर याला डॉक्टरांना जबाबदार धरले जाते. डॉक्टरांना लागणाऱ्या साध्या गरजा पूर्ण होत नाहीत. या सर्वांना कंटाळून गेल्या काही महिन्यात १० ते १२ डॉक्टरांनी हे हॉस्पिटल सोडले आहे. दरम्यान, या हॉस्पिटलमध्ये काही अडचणी जरूर आहेत. त्या दूर करण्यासाठी प्रयत्न सुरू असून लवकरच डॉक्टरांना चांगल्या सुविधा मिळतील, असे हॉस्पिटलच्या वरीष्ठ डॉक्टर प्रतिभा नंदा यांनी सांगितले.