इराणींची कागदपत्रे जाहीर करण्यास स्थगिती

नवी दिल्लीः केंद्रीय मंत्री स्मृती इराणी यांच्या इयत्ता दहावी आणि बारावीच्या शिक्षणविषयक नोंदी जाहीर करण्याच्या केंद्रीय माहिती आयोगाच्या (सीआयसी) आदेशाला दिल्ली हायकोर्टाने स्थगिती दिली आहे. ‘सीआयसी’ने गेल्या महिन्यात याबाबत आदेश दिला होता. कोणत्याही विद्यार्थ्याच्या शैक्षणिक नोंदी जाहीर करता येणार नाहीत, असे ‘सीबीएसई’ने कोर्टात सांगितले होते. अशा नोंदी ‘आरटीआय’अंतर्गत येत नसून, खासगी स्वरूपाच्या नोंदी जाहीर करणे कायद्याच्या चौकटीत बसत नाही, असे हायकोर्टाने निकाल देताना स्पष्ट केले आहे. न्या. संजीव सचदेव यांनी याबाबत निकाल दिला.

या प्रकरणात आपल्या पदवीची कागदपत्रे माहिती अधिकारांतर्गत खुली करू नये, असा आदेश तत्कालीन मनुष्यबळ विकास मंत्री स्मृती इराणी यांनी दिल्ली विद्यापीठाला दिला होता, अशी माहिती विद्यापीठाच्या मुक्त शिक्षण विभागातर्फे केंद्रीय माहिती आयुक्तांना देण्यात आली होती. इराणी यांनी सन २००४, २०११ आणि २०१४ या तिन्ही निवडणुकांच्या वेळी प्रतिज्ञापत्रात विसंगत माहिती दिल्याची तक्रार करण्यात आली होती.