मोदींना राष्ट्रपिता म्हणणारे ट्रम्प आडाणी: ओवेसी

हैदराबाद: पंतप्रधान नरेंद्र मोदी यांचं कौतुक करताना त्यांना 'राष्ट्रपिता' अशी उपाधी देणारे अमेरिकेचे राष्ट्राध्यक्ष डोनाल्ड ट्रम्प यांच्यावर एमआयएमचे नेते, खासदार असदुद्दीन ओवेसी यांनी जोरदार तोफ डागली आहे. 'मोदी राष्ट्रपिता कसे होऊ शकतात? त्यांना तसं म्हणणारे ट्रम्प हा एक आडाणी आणि कमी शिकलेला माणूस आहे. त्यांना ना भारताबद्दल काही माहिती आहे ना महात्मा गांधी यांच्याबद्दल,' असं ओवेसी यांनी म्हटलं आहे.

मोदी राष्ट्रपित्यासारखे महान नेते, ट्रम्प यांची स्तुतीसुमनं

हैदराबाद येथे झालेल्या एका पत्रकार परिषदेत ओवेसी बोलत होते. 'मोदी कधीच 'फादर ऑफ नेशन' होऊ शकत नाहीत. त्यांची आणि गांधीजींची तुलनाच होऊ शकत नाही. ट्रम्प यांना हे माहीत असतं तर त्यांनी अशी जुमलेबाजी केली नसती. महात्मा गांधींनी हा किताब मिळवला होता. लोकांनी त्यांचा त्याग पाहून हा किताब स्वत:हून त्यांना दिला होता. पंडित नेहरू आणि सरदार पटेल हे दोघेही देशातील थोर नेते होते. पण त्यांनाही कधी कुणी 'राष्ट्रपिता' म्हणाले नव्हते,' याकडंही त्यांनी लक्ष वेधलं.

'मोदींना कुणीतरी एल्विस प्रेस्ली म्हणालं होतं. त्यात तथ्य असू शकतं. कारण, एल्विस प्रेस्ली उत्तम गायचे आणि गर्दी जमवायचे. आमचे पंतप्रधान सुद्धा चांगलं भाषण देऊन लोकांना गोळा करतात. ही तुलना कुठंतरी मेळ खाते,' असंही ते म्हणाले. ट्रम्प हे इम्रान खान आणि नरेंद्र मोदी यांच्याशी 'डबल गेम' खेळताहेत. त्यांचा हा डाव समजण्याची गरज आहे,' असा इशाराही ओवेसी यांनी दिला.