आधार लिंकसाठी पेन्शन थांबवू नका: माहिती आयुक्त

नवी दिल्ली :

आधार जोडणीच्या नावाखाली ज्येष्ठ नागरिकांच्या पेन्शनची रक्कम रखडवू नका, अशी सूचना केंद्रीय माहिती आयोगाने आज दिली. या सूचनेमुळे आधार जोडणीअभावी आर्थिक कोंडीत सापडलेल्या पेन्शनधारकांना मोठा दिलासा मिळणार आहे.

अहमदनगरमधील निर्मला निशिकांत धुमाने यांना मार्च २०१७ पासून पेन्शन मिळालेले नाही. आधार कार्डाची प्रत मागत पोस्टाने त्यांच्या पेन्शनची रक्कम रोखून ठेवली आहे. याविरोधात निर्मला यांनी केंद्रीय माहिती आयोगाकडे दाद मागितली होती. त्यांच्या अर्जावर माहिती आयुक्त श्रीधर आचार्युलू यांनी सुनावणी घेत अशाप्रकारे आधारसाठी पेन्शन रोखून धरू नये, अशी स्पष्ट सूचना पोस्ट विभागाला केली.

आधारच्या नावाखाली पेन्शनधारकांना कशाप्रकारे मनस्ताप दिला जात आहे, याचं बिंग फोडणारी आणखीही अनेक प्रकरणं केंद्रीय माहिती आयोगाकडे आली आहेत. एका प्रकरणात तर पेन्शनसाठी आधार जोडणी सक्तीचा जो आदेश देण्यात आला त्याची प्रतही मागण्यात आली आहे. या प्रकारावर माहिती आयुक्तांनी आश्चर्य व्यक्त करताना आधार जोडणीच्या नावाखाली कोणत्याही स्थितीत अधिकारी ज्येष्ठ नागरिक तसेच सेवानिवृत्त कर्मचाऱ्यांचे पेन्शन थांबवू शकत नाहीत, असे आयुक्तांनी बजावले.

ज्येष्ठ नागरिक पेन्शनवर विसंबून असतात. ही बाब अधोरेखित करत एखाद्याचे खाते आधारशी लिंक केले नाही म्हणून पेन्शनला विलंब लावू नका, असेही आयुक्तांनी नमूद केले.