मुस्लिमांनी पुढे यावे!

तिहेरी तलाकप्रकरणी पंतप्रधानांचे आवाहन

वृत्तसंस्था, नवी दिल्ली

तिहेरी तलाकच्या नावाखाली मुस्लिम महिलांना जे भोगावे लागत आहे, त्यातून मार्ग काढण्यासाठी मुस्लिम समाजानेच पुढे आले पाहिजे. हा मुद्दा राजकीय बनवू नका. तिहेरी तलाकपासून महिलांचे संरक्षण करा, असे आवाहन पंतप्रधान नरेंद्र मोदी यांनी शनिवारी केले.

तिहेरी तलाकवरून सर्वोच्च न्यायालयात सुनावणी सुरू असून, केंद्र सरकारने तेथे तिहेरी तलाक, बहुपत्नीत्व आणि निकाह हलाला या प्रथांना विरोध केला आहे. उत्तर प्रदेशातील अनेक पीडित महिला तेथील मुख्यमंत्री योगी आदित्यनाथ यांची भेट घेत आहेत. त्या पार्श्वभूमीवर पंतप्रधान नरेंद्र मोदी यांनी हे आवाहन केले आहे. बसवजयंतीनिमित्त आयोजित कार्यक्रमात ते बोलत होते.

मुस्लिम समाजाला विनंती आहे की, त्यांनी राजकीय चष्म्यातून या प्रश्नाकडे पाहू नये. हा मुद्दा राजकीय बनवू नका. तो सोडविण्यासाठी मुस्लिम समाजातील लोक पुढे येतील आणि मुस्लिम महिलांना या प्रथेपासून वाचवतील असा मला विश्वास आहे. देशात कुठेही भेदभाव होता कामा नये. ‘सबका साथ, सबका विकास’ हे आपल्या सरकारचे उद्दिष्ट आहे. कोणताही भेदभाव न करता हे आ‍श्वासन सरकार पाळेल. भारताचा इतिहास हा फक्त पराभव, दारिद्र्य आणि वसाहतवादाचा नाही. देशाने जगाला पारदर्शक कारभार, अहिंसा आणि सत्याग्रह दिला आहे, असे मोदी म्हणाले.

‘वासनेसाठी तलाक!’

मुस्लिम पुरुष वासना शमविण्यासाठी सातत्याने पत्नी बदलतात, असे खळबळजनक वक्तव्य बहुजन समाज पक्षातून भाजपमध्ये प्रवेश केलेले उत्तर प्रदेशमधील मंत्री स्वामी प्रसाद मौर्य यांनी केले आहे. तोंडी तलाकच्या मुद्द्याबाबत भाजप मुस्लिम महिलांच्या सोबत आहे, असेही त्यांनी म्हटले आहे.