जामीन मिळाला नाही म्हणून जेलमध्येच लग्न!

मटा ऑनलाइन वृत्त । कोटा

लग्नासाठी जामीन मिळत नाही, म्हणून एका कैदी तरुणीने तुरुंगातच आपलं शुभमंगल पार पाडलं आहे. हुंडाबळीसाठी वहिनीच्या हत्या प्रकरणात ही तरुणी तुरुंगाची हवा खात आहे. मंगळवारी कोटा मध्यवर्ती कारागृहात हे लग्न लागलं.

देवकी नावाची ही २२ वर्षांची कैदी येथील तुरुंगात आहे. आपल्याला आपल्या लग्नासाठी जामीन मिळावा म्हणून तिनं प्रयत्न केले. तो मिळाला नाही तेव्हा तिच्या होणाऱ्या पतीनं कोर्टात याचिका दाखल केली आणि तुरुंगातच हे लग्न करू देण्याची मागणी केली. राजस्थान उच्च न्यायालयानं ही मागणी मान्य करत तुरुंगात लग्नाची परवानगी दिली. बुंदी जिल्ह्यातल्या एका गावात राहणारी देवकीची वहिनी उषा देवी हिनं ऑक्टोबर २०१६ मध्ये विष पिऊन आत्महत्या केली. याप्रकरणी उषा देवी हिच्या पतीने केलेल्या तक्रीरीवून देवकी जेलची हवा खात आहे.

देवकी कोटा जिल्ह्यात एका गावात राहणारी आहे तर तिचा पती महेश मेहरा बारन शहरात राहतो. या लग्नाविषयी जेलर योगेश कुमार म्हणाले, 'वराच्या पारंपरिक वेशात नवरा तुरुंगाच्या मुख्य गेटवर वरातींसह पोहोचला. तुरुंगाच्या कर्मचाऱ्यांनी त्यांचं स्वागत केलं. देवकी नवरीच्या वेशात वाट पाहत होती. तिच्या सोबतच्या कैद्यांनी तिच्या माहेरवासियांच्या वतीने करावयाचे सर्व विधी केले.'

देवकीला त्यानंतर जेलच्या कक्षातून जेल परिसरात आणलं गेलं. कोर्टाच्या आदेशानुसार नवरा आणि लग्न लावणारा पुरोहित याव्यतिरिक्त केवळ १० जणांनाच इथे प्रवेश होता. हिंदु रिती-रिवाजानुसार हे लग्न लागलं. लग्न लागल्यानंतर नव्या नवरीला पुन्हा तिच्या जेलच्या कक्षात पाठवण्यात आलं आणि वरात नवरीशिवायच गेली.