वृत्तसंस्था, चंडीगड
पाकिस्तानातून आलेले जीपीएसयुक्त आणि दहा किलो वजन पेलण्याची क्षमता असलेले ड्रोन पंजाबमधील तरण तारण जिल्ह्यात पोलिसांनी हस्तगत केले. हे ड्रोन भारतीय हद्दीत शस्त्रास्त्रे टाकत असल्याचे स्पष्ट होत आहे.
सीमेपलीकडून शस्त्रास्त्रांची तस्करी करण्यासाठी ड्रोनचा वापर केला जात असल्याचे पंजाब पोलिसांना दोन दिवसांपूर्वी तपासादरम्यान आढळले होते. तरण तारणमध्ये अर्धवट जळालेल्या अवस्थेत हे ड्रोन आढळले आहे. हे ड्रोन सात ते आठ वेळा सीमेपलीकडून आले असल्याची माहिती पोलिस अधिकाऱ्यांनी दिली. दरम्यान, या वेळी पाच एके-४७ रायफली, १६ बंदुकीच्या गोळ्यांची मॅगझिन्स, चार चिनी बनावटीची पिस्तुले, ३० बोअर पिस्तुले, दोन मोबाइल फोन, दोन वायरलेस सेट आणि दहा लाख रुपये मूल्य असलेले बनावट चलन पोलिसांनी हस्तगत केले.
या प्रकाराची चौकशी सुरू असून, जम्मू-काश्मीरमध्ये दहशतवाद पसरवण्यासाठी या शस्त्रास्त्रांचा वापर करण्याचे कारस्थान असल्याची शक्यता व्यक्त करण्यात आली आहे. जम्मू-काश्मीरचा विशेष दर्जा काढल्यानंतर पाकिस्तानने अवलंबलेला हा नवीन पवित्रा खूपच गंभीर असल्याची प्रतिक्रिया पंजाबचे मुख्यमंत्री अमरिंदरसिंग यांनी नुकतीच व्यक्त केली आहे, तर या समस्येला तोंड देण्याची विनंती त्यांनी केंद्रीय गृहमंत्री अमित शहा यांना 'ट्विट'द्वारे केली आहे.
केंद्र सरकाला विनंती
सीमेपलीकडून शस्त्रांची तस्करी करण्यासाठी ड्रोनचा वापर केला जात असल्याबद्दल हवाई दल; तसेच सीमा सुरक्षा दलाला दक्ष करण्याची विनंती मुख्यमंत्री अमरिंदरसिंग यांनी केंद्र सरकारला केली आहे. दरम्यान, या प्रकरणाचा तपास राष्ट्रीय तपास यंत्रणेकडे (एनआयए) सोपवण्याचा निर्णय पंजाब सरकारने घेतला आहे.