वडिलांचा मृतदेह बघून मुलगा बेशुद्ध झाला!

मटा ऑनलाइन वृत्त । श्रीनगर

जम्मू-काश्मीरमध्ये शुक्रवारी झालेल्या पोलीस उपअधीक्षक मोहम्मद आयुब पंडित यांच्या खुनानंतर संपूर्ण देशात संताप आणि हळहळ व्यक्त होत आहे. जमावानं आयुब पंडित यांच्यावर केलेला हल्ला काळजाचा थरकाप उडवणारा होता. त्यांना इतक्या निर्घृणपणे मारण्यात आलं की वडिलांचा छिन्नविच्छिन मृतदेह पाहून मुलगा अक्षरश: बेशुद्ध झाला.

श्रीनगरमधील जामिया मशिदीबाहेर साध्या वेषात कर्तव्य बजावणाऱ्या आयुब पंडित यांची काल जमावानं दगडानं ठेचून हत्या केली होती. आयुब यांच्यावर जमावानं धारदार शस्त्रांनी, लाठ्या आणि दगडांनी हल्ला केला गेला. प्रत्यक्षदर्शींनी दिलेल्या माहितीनुसार, आयुब यांचा जीव जाईपर्यंत लोक त्यांना मारत राहिले. त्यांना इतक्या निर्दयीपणे मारण्यात आलं की त्यांचं शवविच्छेदन करणंही कठीण झालं होतं. आयुब यांचा मुलगा तर वडिलांचा मृतदेह पाहताक्षणीच बेशुद्ध पडला.

आयुब यांची मुलगी सानिया बांगलादेशात शिक्षण घेते. ईद साजरी करण्यासाठी ती काश्मीरमधील आपल्या घरी आली होती. मात्र, तिला वडिलांचे अंत्यसंस्कार पाहावे लागले. आयुब यांच्या पुतणीला अश्रू अनावर झाले होते. 'आमच्या निष्पाप काकाला त्यांनी मारले. हो, आम्ही भारतीय आहोत. भारतीय आहोत,' असं ती म्हणाली.

तेव्हा मीरवाइज फारुख मशिदीत होता!

आयुब पंडित यांच्यावर हल्ला झाला तेव्हा काश्मीरमधील फुटीरतावादी नेता मीरवाइज उमर फारुख हा जामिया मशिदीत होता. तो आतमध्ये असल्यानं त्याचे समर्थक मशिदीबाहेर जमले होते आणि पाकिस्तान झिंदाबादच्या घोषणा देत होते. पंडित हे या घोषणांची व्हिडिओ रेकॉर्डिंग करत होते. ते आयबी किंवा 'रॉ'चे गुप्तहेर असावेत, असं समजून जमावानं त्यांच्यावर हल्ला चढवला, अशी माहिती सूत्रांनी दिली आहे.