'तुमच्या देशात बीफ खा; मग भारतात या'

टाइम्स न्यूज नेटवर्क । भुवनेश्वर

केंद्रीय मंत्रिमंडळाच्या विस्तारात मंत्रिमंडळात स्थान मिळालेले पर्यटन राज्यमंत्री के.जे. अल्फोन्स यांनी परदेशी पर्यटकांना अजब सल्ला दिला आहे. पर्यटकांनी आपल्या देशात गोमांस खाऊन भारतात येण्याचा सल्ला त्यांनी दिला आहे.

भारतात काही राज्यांमध्ये गोमांस खाण्यावर बंदी आहे. त्याचा परिणाम देशातील पर्यटन व्यवसायावर होणार नाही का, असा प्रश्न अल्फोन्स यांना विचारण्यात आला होता. त्यावर उत्तर देताना त्यांनी परदेशी पर्यटकांनी आपल्या देशात गोमांस खाऊन यावे असे उत्तर दिले.

इंडियन असोसिएशन ऑफ टूर ऑपरेटर्स आयोजित एका कार्यक्रमात सहभागी होण्यासाठी पर्यटन राज्यमंत्री अल्फोन्स भुवनेश्वर येथे आले होते. काही दिवसांपूर्वीच अल्फोन्स यांनी गोव्यात मनोहर पर्रीकर बीफवर बंदी आणू शकत नाहीत. त्याचप्रमाणे केरळमध्ये बीफ विक्री सुरू राहणार असल्याचे वक्तव्य केले होते. पत्रकारांनी यावेळी त्यांना याबाबत छेडले असता, मी अन्न मंत्री नसल्यामुळे यावर निर्णय घेऊ शकत नसल्याचे म्हणत सारवासारव करण्याचा प्रयत्न केला. देशातील पर्यटन व्यवसायाला चालना देण्यासाठी पर्यटन मंत्रालय वेगवेगळ्या कल्पना आखत असून नागरिकांकडून सूचना मागवण्यात आल्या आहेत. त्यातील काही सूचनांवर काम करणार असल्याचे अल्फोन्स यांनी सांगितले.