लालू, राबडी, तेजस्वींवर आणखी एक गुन्हा

मटा ऑनलाइन वृत्त । पाटणा

राष्ट्रीय जनता दलाचे सर्वेसर्वा लालूप्रसाद यादव यांच्या अडचणींमध्ये आणखी भर पडली आहे. यूपीए शासनकाळात रेल्वे हॉटेल वितरणात झालेल्या भ्रष्टाचार प्रकरणी लालू आणि त्यांच्या कुटुंबातील सदस्यांविरोधात अंमलबजावणी संचालनालयाने गुन्हा दाखल केला आहे. ईडीच्या अधिकाऱ्यांनी आज ही माहिती दिली.

आर्थिक गैरव्यवहार प्रतिबंधक कायद्यांतर्गत (पीएमएलए) हा गुन्हा दाखल करण्यात आला आहे. सीबीआयने याच महिन्यात दाखल केलेल्या गुन्ह्याच्या आधारे ईडीने कारवाईचे पाऊल उचलले आहे. लालू यादव यांनी २००६ मध्ये रेल्वे मंत्री असताना रेल्वेच्या मालकीची हॉटेल्स अल्पभाडे घेऊन खासगी कंपन्यांना भाडेतत्वावर दिल्याचा आरोप आहे. यात झालेल्या 'मनी लॉन्डरिंग'चा तपास ईडी करणार आहे.

लालू यांची पत्नी आणि बिहारच्या माजी मुख्यमंत्री राबडी देवी, मुलगा तेजस्वी यादव आणि अन्य काही जणांवरही ईडीने गुन्हा दाखल केला आहे.

दरम्यान, लालू यादव यांच्यावर चारा घोटाळ्याप्रकरणीही खटला चालू आहे. आज रांची कोर्टात या खटल्याच्या सुनावणीसाठी ते गेले होते. लालू यांचे पुत्र व बिहारचे माजी उपमुख्यमंत्री तेजस्वी यांच्यावरही भ्रष्टाचाराचा गुन्हा दाखल करण्यात आला आहे. त्याआधारेच त्यांचा राजीनामा मागितला जात होता. नितीश यांनी त्याच कारणावरून काल लालू यांच्या पक्षासोबतची मैत्री तोडली होती. आज नितीश भाजपशी नव्याने मैत्री करून पुन्हा बिहारचे मुख्यमंत्री झाले असताना लालूंवर ईडीने गुन्हा दाखल केल्याने येणारा काळ लालू आणि त्यांच्या कुटुंबासाठी खडतर असणार हे स्पष्ट झाले आहे.