देशावर हिंदूराष्ट्र लादण्याचा प्रयत्न

राज्यसभेत विरोधकांची सरकारवर टीका

वृत्तसंस्था, नवी दिल्ली

जवाहरलाल नेहरू विद्यापीठातील (जेएनयू) विद्यार्थ्यांकडून झालेल्या कथित देशद्रोहप्रकरणी सरकारने केलेल्या कारवाईवर राज्यसभेत विरोधी पक्षांनी जोरदार टीका केली. ‘या प्रकरणी दोषी नसलेल्या विद्यार्थ्यांवर केलेली ही कारवाई सरकारच्या अंगाशी येऊ शकते,’ असा इशारा काँग्रेसचे नेते गुलाम नबी आझाद यांनी दिला. दरम्यान, ‘आपल्या कल्पनेतील हिंदूराष्ट्र देशावर लादण्याचा प्रयत्न सत्ताधाऱ्यांकडून केला जात आहे,’ अशी टीका मार्क्सवादी कम्युनिस्ट पक्षाचे नेते सीताराम येचुरी यांनी केली.

जेएनयू प्रकरणी झालेल्या चर्चेत भाग घेताना आझाद म्हणाले, की ‘तेथे झालेल्या देशविरोधी घोषणांचा आमचा पक्ष निषेध करतो. मात्र, या प्रकरणी दोषी असलेल्यांना सोडून निष्पाप विद्यार्थ्यांनाच अटक करण्याचे धोरण सरकारने आरंभले आहे. या प्रकाराचे अतिशय गंभीर परिणाम होऊ शकतात. या घटनेचे वार्तांकन करणाऱ्या एका वृत्तवाहिनीने अतिशय खोडसाळपणा केला असून, भडकपणे व चुकीच्या पद्धतीने त्या बातम्या दिल्या आहेत. हा प्रकारही अतिशय आक्षेपार्ह असून, त्यामुळे समाजात दुही निर्माण होत आहे. मात्र ही वृत्तवाहिनीची सरकारशी जवळीक असल्याने त्यांच्यावर काहीच कारवाई होताना दिसत नाही. देशद्रोहाचे आरोप करताना असा भेदभाव करणे योग्य नाही.

अभाविपच्या राजकारणामुळेच रोहित वेमुलावर आत्महत्या करण्याची वेळ आली,’ असा आरोपही आझाद यांनी केला.