गुजरातमध्ये मंत्र्यावर आदिवासींनी अंडी फेकली

मटा ऑनलाइन वृत्त । सूरत

गुजरात विधानसभा निवडणुकीसाठी काही महिनेच उरले असताना भाजप मंत्र्यांना लोकांच्या रोषाला सामोरे जावे लागत आहे. गुजरात गौरव यात्रे दरम्यान गुजरातचे मंत्री गणपत वासावा भाषण करत असताना त्यांच्यावर आदिवासींनी अंडी फेकल्याचा प्रकार घडला.

गुजरात निवडणुकीआधी प्रचारासाठी भाजपने गुजरात गौरव यात्रा सुरू केली आहे. या गौरव यात्रे दरम्यान मंत्री वासावा भाषण करत होते. त्याच वेळी गुजरातमधील आदिवासी संघटना असलेल्या बिलिस्तान टायगर सेनेच्या कार्यकर्त्यांनी अंडी फेकण्यास सुरुवात केली. मात्र, या अंडी फेकीच्या माऱ्यातून वासावा बचावले. यावेळी संतापलेल्या भाजप कार्यकर्त्यांनी अंडी फेकणाऱ्या कार्यकर्त्यांना मारहाण केली असल्याचा आरोप होत आहे. आदिवासी विभागात कामे न केल्याच्या निषेधार्थ ही अंडी फेक करण्यात आली.