काश्मीर: हिंसक आंदोलनात ९ आंदोलकांचा मृत्यू, अमरनाथ यात्र स्थगित

मटा ऑनलाइन वृत्त। श्रीनगर

हिजबुल मुजाहिद्दीनचा मोस्ट वाँटेड कमांडर बुरहान वानीला चकमकीत ठार केल्याच्या निषेधार्थ काश्मीर खोऱ्यात भडकलेल्या हिंसक आंदोलनात ९ लोकांना आपले प्राण गमवावे लागले आहेत. 'एएनआय' या वृत्तसंस्थेनं दिलेल्या वृत्तानुसार आंदोलक आणि सुरक्षा दलाच्या जवानांमध्ये झालेल्या संघर्षात आत्तापर्यंत ५० लोक जखमी झाले आहेत, तर जम्मू-काश्मीर पोलिसांनी दिलेल्या माहितीनुसार या संघर्षात सुरक्षा दलाचे ९६ जवानही जखमी झाले आहेत. या आंदोलनादरम्यान हिंसक जमावाने पाच इमारतींना आग लावल्याचेही वृत्त आहे. यात तीन पोलीस दलाच्या इमारतींचा समावेश आहे. या व्यतिरिक्त जमावाने काही वाहनंही पेटवून दिली आहेत.

हिंसक झालेल्या आंदोलकांवर कारवाई करताना संयम पाळण्यात येत असल्याची माहिती जम्मू-काश्मीर पोलिसांनी दिली आहे. काश्मीरमधील अनेक भागांमध्ये संचारबंदीसारखी परिस्थिती निर्माण झाली असून संपूर्ण खोऱ्यात मोबाईल इंटरनेट सेवा स्थगित करण्यात आल्या आहेत. चिघळलेली परिस्थिती लक्षात घेत अमरनाथ यात्राही स्थगित करण्यात आली आहे. आज अमरनाथकडे रवाना होणाऱ्या भाविकांच्या पथकांना पुढे जाण्याची परवानगी नाकारण्यात आली आहे.



बुरहान वानीच्या पार्थिवावर त्रालमध्ये झालेल्या अंत्यसंस्काराला हजारो लोक उपस्थित झाले होते. त्यावेळी उत्तर काश्मीरच्या खादीनयार ते दक्षिणेतील कुलगामपर्यंत हिंसक आंदोलन पेटल्याचे वृत्त आहे. दक्षिण काश्मीरच्या अनंतनाग जिल्यातील वेरीनाग विभागात सुरक्षा दलाच्या जवानांनी केलेल्या गोळीबारात आमीर बशीर या २५ वर्षीय तरूणाचा मृत्यू झाला आहे. काल रात्री उशीरा कॅमोह विभागात आणखी एका तरूणाचा मृत्यू झाल्याचे देखील वृत्त आहे. जुबेर अहमद असं त्या तरूणाचं नाव असून त्याच्या छातीत अनेक गोळ्या घुसल्याची माहिती त्याला दाखल करण्यात आलेल्या हॉस्पिटलमधील एका डॉक्टरनं दिली.



याबरोबर साकिब मंजूर या १६ वर्षीय मुलाचा एमएमएचएस हॉस्पिटलमध्ये मृत्यू झाल्याची माहिती एका पोलीस अधिकाऱ्यानं दिली. जखमी झाल्यानंतर काही तरूणांनी त्याला तातडीनं हॉस्पिटलमध्ये हलवलं, मात्र त्याचा उपचारादरम्यान मृत्यू झाला.