सपाची 'सायकल' अखिलेश यांच्याकडं

मटा ऑनलाइन वृत्त । नवी दिल्ली

समाजवादी पार्टी आणि सायकल चिन्ह मिळवण्यासाठी निवडणूक आयोगाच्या दारात गेलेल्या मुलायमसिंह यादव यांना निवडणूक आयोगाने दणका दिला. समाजवादी पार्टी आणि सायकल चिन्ह या दोन्हींवर अखिलेश यादव यांचाच हक्क असल्याचे निवडणूक आयोगाने आज स्पष्ट केले.

मुख्य निवडणूक आयुक्त नसिम झैदी यांच्या अध्यक्षतेखाली तीन सदस्यीय समितीने हा निर्णय दिला. निवडणूक आयोगाच्या समितीने अखिलेश यादव आणि मुलायमसिंह यादव यांच्या दोन्ही गटाचे १३ जानेवारी रोजी ऐकून घेतले. दोन्ही गटाचे ऐकल्यानंतर निवडणूक समितीने आपला फैसला अखिलेश यांच्या बाजुने दिला. समाजवादी पार्टी आणि सायकल चिन्ह हे अखिलेश यादव यांच्याकडेच राहिल, या दोन्हीवर त्यांचाच अधिकार आहे, असे निवडणूक आयोगाने आज स्पष्ट केले आहे. दरम्यान, निवडणूक आयोगाने दिलेल्या निर्णयाचे आम्ही स्वागत करतो असे रामगोपाल यादव यांनी म्हटले आहे. लखनऊला जाऊन आता निवडणुका जिंकायच्या आहेत. सायकल चिन्ह मिळाल्याने उत्तर प्रदेश विधासभा निवडणुकीत कोणासोबत युती करायची की नाही याचा निर्णय अखिलेश यादव हेच घेतील, असे रामगोपाल यादव म्हणाले.

लखनऊ येथील पक्षाच्या कार्यालयात मुलायमसिंह यादव आणि अखिलेश यादव यांच्या दोघांच्या नावाची राष्ट्रीय अध्यक्ष म्हणून पाटी लावण्यात आली होती. दरम्यान, अखिलेश यादव यांच्या समर्थकांना निवडणुकीचे तिकिट नाकारल्याने नाराज झालेल्या अखिलेश यादव यांनी उमेदवारांची स्वतंत्र यादी प्रसिद्ध केली होती. तसेच २१२ आमदारांचा आपल्याला पाठिंबा असल्याने समाजवादी पार्टी हा आपलाच पक्ष असल्याचा दावा केला होता. मुलायमसिंह यादव यांनी सायकल चिन्ह मिळवण्यासाठी निवडणूक आयोगाकडे धाव घेतली होती.


#WATCH Mujhe umeed hain 'mahagathbandhan' hoga: Ram Gopal Yadav #AkhileshCyclesAway pic.twitter.com/VMRnwuoaZd — TIMES NOW (@TimesNow) January 16, 2017