मोटरमनशिवाय एक्स्प्रेसचं इंजिन १३ किमी धावलं

टाइम्स वृत्त | कलबुर्गी

मोटरमनशिवाय एक्स्प्रेसचं इंजिन तब्बल १३ किलोमीटरपर्यंत धावल्याची घटना कर्नाटकातील कलबुर्गीमधील वाडी स्थानकावर घडली. धावणारे इंजिन पाहून मोटरमनची भंबेरीच उडाली. त्यानं मोटरसायकलवरून पाठलाग करत इंजिन थांबवलं. त्यामुळं मोठा अनर्थ टळला.

चेन्नईहून मुंबईला येणारी एक्स्प्रेस काल, बुधवारी संध्याकाळी तीन वाजता वाडी स्थानकातील फलाट क्रमांक चारवर थांबली. तेथे वीजेवर चालणारे इंजिन बदलण्यात आले. डिझेलचे इंजिन जोडून एक्स्प्रेस रवाना केली. साडेतीनच्या सुमारास मोटरमन इंजिनमधून उतरला. पण काही वेळाने इंजिन धावू लागले. धावणारे इंजिन पाहून त्याला धक्काच बसला. याची माहिती वाडी स्थानकातील अधिकाऱ्यांनी इतर स्थानकांवरील अधिकाऱ्यांना दिली आणि इंजिनचा मार्ग मोकळा करण्याच्या सूचना दिल्या. तोपर्यंत वाडी स्थानकातील व्यवस्थापक जे. एन. पॅरिस आणि मोटरमनने मोटरसायकलवरून इंजिनचा पाठलाग सुरू केला. २० मिनिटे हा थरार सुरू होता. त्यानंतर इंजिनचा वेग कमी झाला. अखेर मोटरमनने नलवार स्थानकाच्या अलिकडे इंजिन थांबवले. वेळीच इंजिन थांबवले नसते तर मोठी दुर्घटना घडली असती, असे व्यवस्थापक पॅरिस यांनी सांगितले.