ईपीएफओच्या ऑफिसमध्ये कोट्यवधींचा घोटाळा

नवी दिल्लीः

दिल्लीत द्वारकामधील कर्मचारी भविष्य निर्वाह निधी संस्थे (EPFO)च्या ऑनलाइन ऑफिसमध्ये घोटाळा झाल्याचे वृत्त आहे. ईपीएफओच्या अकाउंटमधून कोट्यवधी रुपये काढण्यात आलेत. ४ कोटी रुपये काढल्याची माहिती प्राथमिक तपासातून समोर आली आहे. खासगी क्षेत्रात काम करणाऱ्या हजारो कर्मचाऱ्यांचा हा पैसा आहे.

या प्रकरणी ईपीएफओने द्वारकामधील पोलीस ठाण्यात तक्रार केल्यानंतर एफआयआर दाखल झाली आहे. पोलिसांनी याप्रकरणी चौकशी सुरू केली असून ईपीएफओच्या एका कर्मचाऱ्याला ताब्यात घेतलं आहे. घोटाळा किती मोठा आहे आणि त्यात कोण-कोण सामील आहे हे चौकशीतून स्पष्ट होईल, अशी अपेक्षा आहे.

ईपीएफओद्वारे वर्षाचा ताळेबंद तपासण्यात येत असताना हा घोटाळा उघड झाला आहे. ऑनलाइन कॅश ट्रॅन्झॅक्शनची रक्कम आणि खात्यातील जमा रकमेत कुठलाही ताळमेळ बसत नसल्याचं तपासणीत समोर आलं. काही ट्रॅन्झॅक्शन अशा अकाउंट्समध्ये झालेत ज्यांची माहिती वरिष्ठ अधिकाऱ्यांनाही नाही. यामुळे सुरुवातीला ईपीएफओद्वारे अंतर्गत चौकशी करण्यात आली होती.

बोगस खात्यात रक्कम ट्रान्स्फर

ईपीएफओच्या या ऑफिसमधून दिल्ली-एनसीआरसह संपूर्ण देशातील ऑनलाइन अकाउंट हाताळले जातात. ऑनलाइन ट्रॅन्झॅक्शनचे काम ईपीएफओने आउटसोर्स केले आहे. आउटसोर्सचे काम दिलेल्या कंपनीतील काही कर्मचाऱ्यांनी १० बनावट नावं आणि पत्त्यांच्या आधारावर बँक अकाउंट उघडले. याच बोगस खात्यांमध्ये कोट्यवधी रुपये ट्रान्स्फर केले गेलेत. घोटाळ्याची रक्कम खूप मोठी असल्याचं सांगण्यात येतंय.