काश्मीरमध्ये पहिल्यांदाच 'गरुड कमांडो' शहीद

मटा ऑनलाइन वृत्त । श्रीनगर

बांदीपुरा येथील हाजिन परिसरात बुधवारी दहशतवाद्यांबरोबर झालेल्या चकमकीत हवाई दलाचे दोन गरुड कमांडो शहीद झाले आहेत. काश्मीरमध्ये अतिरेक्यांशी दोन हात करताना हवाई दलाच्या गरुड कमांडो फोर्समधील जवान शहीद होण्याची ही पहिलीच वेळ आहे.

चंदीगडचे मिलिंद किशोर आणि निलेश कुमार अशी या गरुड कमांडो फोर्समधील दोन शहीदांची नावे आहेत. दहशतवाद्यांबरोबर मुकाबला करण्यासाठी काश्मीरमध्ये लष्करासोबत हवाई दलाच्या गरुड फोर्सचे कमांडो प्रशिक्षण घेत आहेत. त्यांना एअरबॉर्न ऑपरेशन्स, एअरफिल्ड सीजर आणि काउंटर टेररिजमचे प्रशिक्षण दिलं जात आहे. गरुड कमांडोजचे हे सर्वात कठीण प्रशिक्षण असते. त्यांना ५२ आठवड्यासाठी प्रशिक्षण दिलं जातं. बुधवारी बांदीपुरात अतिरेक्यांशी चकमक सुरू असताना या दोन्ही गरुड कमांडोजना वीरमरण आलं होतं.

२००१ मध्ये काश्मीरात दहशतवाद्यांनी एअर बेसवर हल्ला केला होता. त्यामुळे हवाई दलाला एका विशेष एअर फोर्सची गरज वाटू लागली होती. त्यानंतर एअर बेसच्या सुरक्षेसाठी २००४ मध्ये गरुड कमांडो फोर्सची स्थापना करण्यात आली होती.