उपराष्ट्रपती निवडणूक: नितीश युपीएसोबतच

टाइम्स न्यूज नेटवर्क । नवी दिल्ली

भाजपसोबत हातमिळवणी करून नितीश कुमार यांनी एनडीएसोबत घरोबा केला असला तरी उपराष्ट्रपतिपदाच्या निवडणुकीत युपीएचे उमेदवार गोपाळकृष्ण गांधी यांनाच पाठिंबा देणार आहेत.

नितीश यांच्या जनता दल (यु) पक्षाने विरोधकांचे उमेदवार म्हणून गोपाळकृष्ण गांधी यांच्या नावावर सहमती दर्शवली होती. त्यानंतर बुधवारी रात्री नाट्यमय घडामोडीनंतर नितीश यांनी भाजपसोबत युती केली. त्यामुळे उपराष्ट्रपतिपदाच्या निवडणुकीत जदयू एनडीएचे उमेदवार व्यंकय्या नायडू यांना मतदान करतील अशी अटकळ बांधली जात होती. सूत्रांनी दिलेल्या माहितीनुसार, नितीश यांनी आपल्या पक्षाची भूमिका बिहार आणि राष्ट्रीय राजकारणाच्या अनुषगांने वेगळी असल्याचे स्पष्ट केले आहे. नितीश यांनी युपीएचे उमेदवार गोपालकृष्ण गांधी यांना दिलेला पाठिंबा कायम असल्याचे आमदारांच्या बैठकीत सांगितले असल्याची माहिती सूत्रांनी दिली. गुरुवारी जदयू आमदारांची बैठक झाली. या बैठकीत गोपाळकृष्ण गांधी यांनाच मतदान करण्याचा निर्णय घेतला असल्याची माहिती बैठकीत उपस्थित असलेल्या एका वरिष्ठ नेत्याने दिली.