'ई-नेत्र' ठेवणार निवडणुकांवर नजर

नवी दिल्ली:

निवडणूक काळात मतदारांना आकर्षित करण्यासाठी पैसे, दारू वाटप करणे किंवा भडकावू भाषणं दिली जातात. त्याला आता लगाम घालणं शक्य होणार आहे. ई-नेत्र हे मोबाइल अॅप आणण्याचा विचार निवडणूक आयोग करत असून, या अॅपद्वारे मतदारांनाच निवडणुकांमधील 'गैरकारभार' उजेडात आणता येणार आहे. याशिवाय संबंधित व्यक्ती आणि नेत्याविरोधात तक्रार करता येणार आहे. निवडणूक आयोगाची ही नवीन योजना यशस्वी झाल्यास आगामी लोकसभा निवडणुकीपर्यंत प्रत्येक मतदार हा पोलिसाच्या भूमिकेत दिसू शकतो.

निवडणूक आयोग ई-नेत्र या मोबाइल अॅपच्या निर्मितीवर काम करत आहे. जर एखादा नेता मतदारसंघात आचारसंहितेचं उल्लंघन (पैसे अथवा दारू वाटणे, चिथावणीखोर भाषण देणे) करत असेल, तर या अॅपच्या माध्यमातून संबंधित नेत्याची तक्रार करता येऊ शकते. पुरावा म्हणून फोटो आणि व्हिडिओ अपलोड करावा लागेल, अशी माहिती मुख्य निवडणूक आयुक्त ओ. पी. रावत यांनी 'इकॉनॉमिक टाइम्स'ला दिली.

माहिती आणि तंत्रज्ञान विभागानं आगामी लोकसभा निवडणुका डोळ्यांसमोर ठेवून एक मोबाइल अॅप तयार केलं आहे. मध्य प्रदेश, राजस्थान, छत्तीसगड आणि मिझोराम या राज्यांमध्ये होणाऱ्या निवडणुकांमध्ये या अॅपचा प्रायोगिक तत्त्वावर वापर केला जाणार आहे. लाखो नागरिक हे मोबाइल अॅप डाउनलोड करून निवडणूक आयोगाची मदत करतील. या अॅपद्वारे कोणीही संबंधित घटनेचा व्हिडिओ अपलोड करू शकतो. व्हिडिओ नसला तरीही तक्रार करता येणार आहे. मात्र, त्यासाठी इतर ठोस पुरावे असणे गरजेचे आहे, अशी माहितीही रावत यांनी दिली.