इस्लामवर ड्रोन हल्ले सुरुच : पाक कोर्ट

टाइम्स न्यूज नेटवर्क । नवी दिल्ली

पाकिस्तान सरकारने सांगितल्यानंतर इस्लामची बदनामी करणारा ८५ टक्के मजकूर फेसबुकवरून हटवला गेला असला तरीही उरलेल्या १५ टक्के मजकुराकडे बोट दाखवत इस्लामाबाद न्यायालयाने तीव्र नाराजी व्यक्त केली आहे. यावेळी 'पाकिस्तानच्या विचारधारेवर आजही ड्रोन हल्ले होत आहेत' अशी तीव्र टिपण्णीही न्यायालयाने केली आहे. 'दि न्यूज'ने याबाबत वृत्त दिले आहे.

'पैगंबर मोहम्मद यांनी प्रेम आणि बंधुभावाची शिकवण दिली आहे. त्या शिकवणीच्या समान धाग्यात पाकिस्तानातील प्रत्येक नागरिक जोडला गेलेला आहे. असे असताना देशाच्या विचारधारेवरच हल्ले केले जात आहेत', असे मत उच्च न्यायालयाचे न्यायाधीश शौकत अझीज सिद्दीकी यांनी नोंदवले.

इस्लामची बदनामी करणाऱ्या मजकुराची चौकशी करण्याचा व तो न हटवल्यास फेसबुक व इतर सोशल मीडियावर बंदी घालण्याचा आदेश इस्लामाबाद उच्च न्यायालयाने पाकिस्तान सरकारला यापूर्वीच दिला होता. याप्रकरणी कारवाई करण्यासाठी पाकिस्तानचे अंतर्गत मंत्री निसार अली खान यांनी फेसबुकशी संपर्कही साधला. त्यानंतर सुमारे ८५ टक्के आक्षेपार्ह मजकूर हटवण्यात आला असून आता केवळ १५ टक्के मजकूर उरला आहे' अशी माहिती पाकिस्तानच्या अंतर्गत सचिवांनी न्यायालयाला दिली तर 'मजकूर हटवण्याची आपली मागणी फेसबूकने मान्य करणे हे एक मोठे यश आहे' असे पाकिस्तानच्या दूरसंचार प्राधिकरण विभागाच्या अधिकाऱ्यांनी नमूद केले. मात्र त्यांच्या या युक्तिवादाचा इस्लामाबाद उच्च न्यायालयावर काही प्रभाव पडला नाही.

'सोशल मीडियावर आपल्याविरोधात (पाकिस्तान) युद्ध छेडले गेले असेल तर त्यावर आपल्याकडे काय उपाययोजना आहे आणि आपल्या तांत्रिक विभागाने काय कारवाई केली?,' असा सवाल न्यायालयाने विचारला. तसेच याप्रकरणी मूक दर्शकाची भूमिका निभावत कोणतीही कारवाई न करणाऱ्या माहिती तंत्रज्ञान विभागालाही न्यायालयाने फटकारले.

दरम्यान, बदनामीकारक मजकूर टाकल्याप्रकरणी यापूर्वी २०१० साली पाकिस्तानात फेसबुकवर दोन आठवड्यांची बंदी घालण्यात आली होती.