गरीबीमुळे पोटच्या पोरीला आईने ५ हजारांना विकलं!

मटा ऑनलाइन वृत्त । हैदराबाद

गरीबी माणसाला काय काय करायला लावू शकते त्याचं अत्यंत विदारक रुप तेलंगणात समोर आलं. एका महिलेनं आपल्या कोवळ्या जीवाला अवघ्या पाच हजार रुपयांना विकलं. तेलंगणातल्या खम्माम जिल्ह्यात एका रुग्णालयात या महिलेनं आपल्या सहाव्या मुलीला जन्म दिला. नंतर रुग्णालयातल्या एका स्वीपरच्या मदतीने तिनं अन्य एका महिलेला या मुलीला विकलं. गरीबीपोटी तिनं असं केल्याचं पोलिसांचं म्हणणं आहे. अर्थात तिचं हे बिंग फुटलं.

मुलीच्या आईनं भद्राचलम भागातल्या एका वृद्ध महिलेला आपली मुलगी ५ हजार रुपयांना विकण्याचा निर्णय घेतला. या वृद्धेला नातवंड नव्हतं. त्यामुळे ती या नवजात मुलीला विकत घेणार होती. पण पोलिसांना या सर्व प्रकाराचा माग लागला. या वृद्धेनं पुन्हा मुलीला आईकडेच सोपवलं. आई, वृद्धा आणि रुग्णालयातला स्वीपर यांच्याविरोधात गुन्हा दाखल करण्यात आला आहे.

इंटिग्रेटेड चाइल्ड डेव्हलपमेंट सर्व्हिसेसचे अधिकारी नवजात मुलीचा सांभाळ करत आहेत. सहाय्यक पोलीस आयुक्त पी. व्ही. गणेश यांनी दिलेल्या माहितीनुसार, या महिलेला चार मुली आणि एक मुलगा आहे. तिचा नवरा दारुड्या आहे. तो रिक्षा चालवतो, पण सर्व कमाई दारुत उडवतो. सहावी मुलगी झाली. तिला सांभाळायला पैसे नाहीत म्हणून आईनं तिला विकाचयं ठरवलं. मात्र तिला विकत घेण्यास राजी झालेल्या वृद्धेनं हे फेटाळून लावलं आहे. मुलीच्या आईनं आपल्याकडून उपचारांसाठी ५ हजार रुपये घेतल्याचं वृद्धेचं म्हणणं आहे.