हरयाणात खिचडीत साप शिजला

मटा ऑनलाइन वृत्त । फरिदाबाद

हरयाणाच्या एनआयटी-२ येथील मुलींच्या शाळेत देण्यात येणाऱ्या खिचडीत साप आढळल्याने एकच खळबळ उडाली आहे. सापाबरोबर शिजलेली ही खिचडी खाल्ल्याने ७ विद्यार्थीनी आणि शाळेच्या ६ कर्मचाऱ्यांची प्रकृती बिघडली असून त्यांना उपचारासाठी रूग्णालयात दाखल करण्यात आले आहे.

एनआयटी-२ येथे गव्हर्नमेंट गर्ल्स सिनियर सेकंड्री स्कूल आहे. या शाळेत गुरूवारी विद्यार्थ्यीनींना मध्यान्ह भोजन म्हणून खिचडी देण्यात आली होती. इयत्ता ८ वीची विद्यार्थीनी असलेल्या सोनियालाही खिचडीचे वाटप करण्यात आले होते. पण तिच्या खिचडीत तिला सापाचे पिल्लू आढळले. त्यामुळे घाबरलेल्या सोनियाने याबाबतची माहिती तिच्या शिक्षकांना दिली. पण तिच्या म्हणण्याकडे कुणीच लक्ष दिले नाही. त्यानंतर सोनियाने मध्यान्ह भोजन वाटप करणाऱ्या अंजूलाही हा प्रकार सांगितला. अंजूने खिचडी पाहिल्यावर तिला त्यात सापाचं पिल्लू दिसलं. त्यानंतर मुख्याध्यापिका बृजबाला यांनी ही माहिती जिल्हा शिक्षण अधिकारी सतेंद्र कौर यांना दिली. तोपर्यंत कोमल आणि लक्ष्मी या दोन विद्यार्थीनींनी खिचडी खाल्लेली होती. खिचडी खाल्ल्यानंतर त्यांच्या गळा दुखू लागला. त्याशिवाय एका मुलीने तर उलटी करायला सुरूवात केली. त्यानंतर कमला, अपूर्वा, आरती, हेमलता, नंदिनी, मनीषा आणि अनुजा यांच्यासह शाळेतील ६ कर्मचाऱ्यांनी खिचडी खाल्याने त्यांना उचारासाठी रूग्णालयात दाखल करण्यात आले. त्यांची प्रकृती उत्तम असल्याचं सांगण्यात आलं.

दरम्यान या घटनेनंतर खिचडीचं वाटप तात्काळ बंद करण्यात आलं. या घटनेची माहिती मिळाल्यानंतर पोलीस आणि खिचडी पुरवठा करणाऱ्या इस्कॉन संस्थेचे पदाधिकारी घटनास्थळी धाव घेऊन त्यांनी खिचडीचे सँपल गोळा केले. याप्रकरणी अधिक तपास सुरू आहे.