प्रेमापोटी शेतकऱ्यानं बांधलं पत्नीचं मंदिर

चामराजनगर:

महाराष्ट्र टाइम्स.कॉम

देवदेवतांच्या भक्तीपोटी भक्तांनी मंदिरं बांधल्याचं आपण अनेकदा पाहिलं असेल. पण कर्नाटकातील राजूस्वामी उर्फ राजू या शेतकऱ्यानं आपल्या पत्नीचं बांधलेलं मंदिर सध्या चर्चेचा विषय ठरत आहे. त्यांनी फक्त मंदिर बांधलं नाही, तर राजू हे गेली १२ वर्षे दररोज पत्नीची पूजा करत आहेत. कृष्णपुरालगच्या अन्य गावांमध्येही हे 'प्रेम मंदिर' आता प्रसिद्ध झालं असून जवळपासच्या गावातील ग्रामस्थ या मंदिराला भेट देण्यासाठी येत आहेत.

‘टाइम्स ऑफ इंडिया’शी बोलताना राजू यांनी हे मंदिर का बांधलं याची माहिती दिली. येलंदूर तालुक्यातील कृष्णपुरा गावात राहणाऱ्या राजू यांची गावात दोन एकर शेती आहे. ते सांगतात, बहिणीच्या मुलीशीच लग्न करण्याचा निर्णय घेतला त्यामुळं आई-वडिलांचा विरोध होता, पण नंतर त्यांचा विरोध मावळला. माझी बहीण व भावोजींनी या लग्नाला विरोध केला नाही. लग्नानंतर काही महिन्यांनी माझ्या पत्नीनं म्हणजेच राजम्मानं गावात तिचं स्वतःचं मंदिर असावं अशी इच्छा माझ्याजवळ व्यक्त केली होती. पण मंदिर बांधण्यापूर्वीच तिचं निधन झालं. माझ्या पत्नीला तिच्या मृत्यूची पूर्वकल्पनाच आली असावी. तिच्याकडं एक विशेष शक्तीच होती. तिच्या डोक्यात दिवसरात्र फक्त मंदिराचाच विचार असायचा. ती खूपच धार्मिक होती आणि म्हणूनच मी हे मंदिर बांधलं.

२००६ मध्ये या मंदिराचं काम पूर्ण झालं असून गेली १२ वर्षे राजू दररोज भगवान शंकर व अन्य देवतांसोबत पत्नीची पूजा करत आहेत. मंदिरात पत्नीला स्थान देताना अनेकांनी विरोध दर्शवला, पण त्याकडं दुर्लक्ष केल्याचं राजू यांनी सांगितलं.