हाँगकाँगमध्ये फुटले
लिंगचाचणीचे पेव
हाँगकाँग : चीनमध्ये गर्भलिंग चाचणीस बंदी असल्याने हाँगकाँगमध्ये जाऊन अशी चाचणी करण्याचे पेव फुटले आहे. गर्भलिंग चाचणीसाठी वेईबो आणि अन्य वेबसाइटवर सर्रास जाहिराती दिल्या जात आहेत. चीनमध्ये 'एक मूल' धोरणात बदल होऊन आता दोन मुलांच्या जन्मास परवानगी देण्यात आली असली, तरी गर्भलिंग चाचणी सुरूच आहेत. एकच मूल धोरणामुळे अनेक कुटुंबे मुलांना प्राधान्य देऊ लागली होती. गेल्या वर्षी चीनमध्ये १०० मुलींमागे ११५ मुले असल्याची आकडेवारी प्रसिद्ध झाली आहे. एकच मूल धोरणात बदल होऊनही मुलांनाच प्राधान्य देण्याच्या वृत्तीमुळे गर्भलिंग चाचणी करणाऱ्या कुटुंबांची संख्या मोठी आहे. या चाचणीसाठी रक्ताचे नमुने बेकायदा तेथे नेले जातात.
----------------
मोगादिशूत बाँबहल्ला
मोगादिशू : सोमालियाची राजधानी मोदादिशूत एका तपासणी नाक्यावर मोटारीत बाँबस्फोट घडविण्यात आला. यात दोन जण ठार झाले असून, १२ जण जखमी झाले आहेत. दहशतवादी संघटना 'अल शबाब'ने हल्ल्याची जबाबदारी स्वीकारली आहे. राष्ट्रपती भवनाकडे निघालेल्या काही अधिकारी आणि नेत्यांच्या गाड्यांना लक्ष्य करून हा हल्ला करण्यात आला होता. यात अनेक वाहने उद्ध्वस्त झाली आहेत.
-----------------------
राजस्थानात बलात्कार
जयपूर : झारखंडच्या दोन अल्पवयीन मुलींवर दोन अल्पवयीन मुलांसह चौघांनी बलात्कार करण्याची घटना उघडकीस आली आहे. संबंधित मुलींना मोंटू नावाच्या एका कंत्राटदाराने नोकरीसाठी भिलवाडा जिल्ह्यात आणले होते. त्यासाठी तिच्या पालकांना पैसे देण्यात आले. संबंधित मुली एका कारखान्यात काम करीत होत्या. मात्र तेथे मोंटू, चंद्रकांत आणि दोन अल्पवयीन मुलांनी तिच्यावर बलात्कार केला. सहा महिने हा प्रकार सुरू होता. दोघींकडून १६ तास काम करून घेतले जात होते. आई-वडिलांशी बोलू दिले जात नव्हते. अखेर संबंधित मुलींनी तेथून पळ काढला आणि पोलिसांत तक्रार दिली. आरोपी फरारी झाले आहेत.
---------------
चकमकीत गुंड ठार
मुजफ्फरनगर : खून आणि दरोड्याचे १२हून अधिक गुन्हे दाखल असलेला एक गुंड बुधवारी पोलिसांशी चकमकीत ठार झाला. या चकमकीत एक पोलिसही जखमी झाला आहे. अशू असे या गुंडाचे नाव आहे. त्याच्यावर मुजफ्फरनगर, मेरठ आणि बागपत जिल्ह्यात गुन्हे दाखल आहेत. त्याच्याजवळून दोन पिस्तुले जप्त करण्यात आली आहेत.
--------------
सीमेवर स्फोटात आठ जखमी
जम्मू : पूँच जिल्ह्यात ताबारेषेवर प्रशिक्षण सुरू असताना झालेल्या स्फोटात आठ जवान जखमी झाले. स्फोटके हाताळण्याचे प्रशिक्षण देताना हा स्फोट झाला. सुरुवातीला यात एक अधिकारी ठार झाल्याचे सांगण्यात आले होते. मात्र संबंधित अधिकारी जखमी असून, गंभीर असल्याचे सांगण्यात आले. जखमींना रुग्णालयात दाखल करण्यात आले आहे.
--------------------
दंगलीत सहा ठार
जाकार्ता : निवडणुकीत पराभूत झालेल्या उमेदवाराच्या समर्थकांनी जाकार्ता शहरात हिंसाचार केला. यात अनेक वाहने जाळण्यात आली; तसेच पोलिसांवर बाटल्या फेकण्यात आल्या. जमावाला पांगविण्यासाठी पोलिसांनी अश्रुधुराच्या नळकांड्या, पाण्याचा मारा आणि रबरी गोळ्यांचा वापर केला. या दंगलीत सहा जण ठार झाले आहेत. अतिउजवे राष्ट्रवादी नेते माजी जनरल प्रबोवो सुबियांतो यांनी पराभव होऊनही तो स्वीकारण्यास नकार दिला आणि स्वत:ला विजयी घोषित केले. त्यानंतर त्यांच्या समर्थकांनी हिंसाचार सुरू केला.