महिलेच्या अटकेवर सुप्रीम कोर्टात सुनावणी
नवी दिल्ली : पश्चिम बंगालच्या मुख्यमंत्री ममता बॅनर्जी यांचे मॉर्फ छायाचित्र समाज माध्यमांवर शेअर करण्याच्या आरोपावरून महिलेला अटक करण्याच्या विरोधात केलेल्या याचिकेवर सुनावणी घेण्यास सर्वोच्च न्यायालयाने तयारी दाखवली आहे. न्यायमूर्ती इंदिरा बॅनर्जी आणि संजीव खन्ना यांच्या सुटीतील खंडपीठाने या याचिकेवर तातडीचे सुनावणी घेण्यास मंजुरी दिली. सध्या संबंधित महिला न्यायालयीन कोठडीत आहे.
सनी देओल बचावले
गुरुदासपूर : अभिनेता आणि भारतीय जनता पक्षाचे नेता सनी देओल सोमवारी एका अपघातातून बचावले. देओल यांच्या मोटारीचे चाक सोहल गावातील एका गुरुद्वाराजवळ फुटले, त्यामुळे मोटार दुसऱ्या मोटारीला जाऊन धडकली. या अपघातात एकूण चार वाहने एकमेकांना धडकली. मात्र या अपघातात जीवितहानी झाली नाही, अशी माहिती पोलिसांकडून देण्यात आली.
सौदीच्या तेल टँकरवर हल्ला
फुजैरा : अमेरिका आणि इराणमध्ये सुरू असलेल्या संघर्षामुळे आखाती देशांमध्ये तणावाचे वातावरण असतानाच सोमवारी सौदी अरेबियाने आपले तेलाचे दोन टँकर घातपाती हल्ला करून गूढरीत्या उद्ध्वस्त केले असल्याचा दावा केला. या हल्ल्याची चौकशी करण्याची मागणी इराणने केली आहे. आखाती देशांच्या सागरी सुरक्षिततेला धक्का देण्याचा हा प्रयत्न आहे, असे सांगून इराणने त्या विरोधात इशारा दिला आहे, तर या घटनेमुळे आखातात संघर्षाचा धोका उसळून वर आला आहे, असा इशारा ब्रिटनने दिला आहे. अमेरिकेने आखातात आपली ताकद यापूर्वीच वाढविली आहे. इराणच्या धमक्यांच्या पार्श्वभूमीवर बी-५२ बॉम्बर तैनात केले आहेत. दरम्यान, सौदी अरेबियाने या हल्ल्याचा निषेध केला आहे. ही कृती सुरक्षेला असलेला गंभीर धोका आहे, असे सांगून वेगवेगळ्या देशांच्या चार व्यापारी बोटींना लक्ष्य केल्याचे म्हटले आहे. मात्र, सोदी अथवा संयुक्त अरब अमिरातीनेही या संबंधात अधिक तपशील दिलेला नाही.
....
पीडिता बेपत्ता
पणजी : गोव्यातील मंत्री आणि पणजी पोटनिवडणुकीतील काँग्रेसचे उमेदवार अतांसिओ मोन्सेरात यांच्याविरोधात बलात्काराची तक्रार देणारी महिला येथील पुनर्वसन केंद्रातून बेपत्ता झाल्याची माहिती सोमवारी पोलिसांनी दिली. मोन्सेरात यांनी २०१६मध्ये आपण अल्पवयीन असताना आपल्यावर बलात्कार केल्याचा आरोप संबंधित महिलेने केला होता. ती सध्या दक्षिण गोव्यात एका पुनर्वसन केंद्रात राहात होती. २८ एप्रिलपासून ती बेपत्ता आहे.
पीडितेने जाळून घेतले
मेरठ : उत्तर प्रदेश पोलिसांनी तक्रार दाखल करण्यास नकार दिल्याने पीडितेने सोमवारी स्वत:ला जाळून घेतले. संबंधित पीडितेला दहा हजार रुपयांना विकण्यात आले होते आणि घरकाम करण्याची जबरदस्ती करून तिच्यावर बलात्कार करण्यात आला होता. ही महिला तक्रार नोंदविण्यासाठी गेली असता तिची तक्रारही नोंदविण्यात आली नाही. अशी माहिती दिल्ली महिला आयोगाने दिली. पीडिता ८० टक्के भाजली असून, तिला गाझियाबाद येथील रुग्णालयात उपचारासाठी दाखल करण्यात आले आहे.