१ डिसेंबरपासून वाहनांसाठी फास्टॅग अनिवार्य

मटा ऑनलाइन वृत्त। नवी दिल्ली

देशभरात येत्या १ डिसेंबरपासून विक्री होणाऱ्या सर्व चारचाकी वाहनांना फास्टॅग लावणे अनिवार्य करण्यात आले आहे. वाहनावर फास्टॅग लावण्याची जबाबदारी वाहन निर्मात्याची किंवा वाहन विकणाऱ्या अधिकृत डीलरची असणार आहे, असे याबाबत केंद्र सरकारने आज (गुरुवार) काढलेल्या अधिसूचनेत स्पष्ट करण्यात आले आहे.

फास्टॅग कशासाठी?

फास्टॅग रेडिओ फ्रिक्वेन्सी टॅगसारखाच आहे. हा टॅग वाहनाच्या स्क्रीनवर लावला जातो. फास्टॅग रिचार्ज करता येतो शिवाय कोणत्याही टोल नाक्यावर थांबून टोल द्यावा लागत नाही हा फास्टॅगचा फायदा आहे. फास्टॅग ही इलेक्ट्रॉनिक पद्धत असून फास्टॅगमुळे टोल नाक्यावर वाहनाची ओळख होते आणि त्या वाहनाचा टोल फास्टॅगमधील जमा रकमेतून कापला जातो. टॅगमधील रक्कम संपल्यानंतर फास्टॅग रिचार्ज करावा लागतो.

टोल प्लाझावर गर्दी नाही

परिवहन मंत्रालयाने ही पद्धत यापूर्वीच लागी केली आहे. सरकारने प्रत्येक टोल नाक्यावर फास्टॅगवाल्या वाहनांसाठी वेगळी लेन ठेवण्याचा निर्णय घेतला आहे. सरकारच्या अपेक्षेप्रमाणे अद्याप मोठ्या संख्येने फास्टॅग लावलेली वाहनांची संख्या वाढलेली दिसत नाही, मात्र फास्टॅगच्या विक्रीत मोठी वाढ होत आहे.